اسلام آباد۔ 2 جولائی (اے پی پی) چیئرمین پاکستان پیپلز پارٹی بلاول بھٹو زرداری آکھیے جو پاکستان دے انسداد دہشت گردی دے اقدامات دا عالمی سطح تے بھرپور اعتراف کریندے انہاں کوں شراکت داری دے ذریعے سپورٹ کیتا ونڄٖے تاں جو دہشت گردی دے ناسور کوں منڈھوں مکایا ونڄ سڳے ، ڈیجیٹل سپیس اچ انسداد انتہا پسندی کیتے عالمی تعاون ودھایا ونڄے۔انہاں اے ڳالھ اسلام آباد پالیسی ریسرچ انسٹیٹیوٹ (آئی پی آر آئی) دے زیر اہتمام ہک اہم بین الاقوامی کانفرنس نال خطاب کریندے آکھی جیں دا عنوان “پاکستان – دہشت گردی دے خلاف ہک تکڑی دیوار” ہئی۔ ایں کانفرنس دا مقصد پاکستان دی انسداد دہشت گردی اچ خدمتاں، قربانیاں اَتے حکمت عملی کوں اجاگر کرݨ ہئی۔ آئی پی آر آئی دی طرفوں جاری پریس ریلیز موجب، پاکستان پیپلز پارٹی دے چیئرمین بلاول بھٹو زرداری کانفرنس نال افتتاحی خطاب کیتا۔ انہاں آکھیا جو اساں دہشت گردی دے خلاف 92,000 توں ودھ جاناں دی قربانی ݙتی، 150 ارب ڈالر توں ودھ دا معاشی ضیان چاتا، مگر دنیا اساݙیاں قربانیاں کوں بجا طور تے تسلیم کرݨ دی بجائے سوال کریندی اے جو کیا پاکستان کافی کریندا پئے ؟ انہاں آکھیا جو پاکستان دے انسداد دہشت گردی اقدامات کوں عالمی سطح تے معاونت اَتے شراکت داری دے ذریعے سپورٹ کیتا ونڄے تاں جو دہشت گردی دے ناسور کوں مںڈھوں ختم کیتا ونڄ سڳے، ڈیجیٹل سپیس اچ انسداد انتہا پسندی کیتے عالمی تعاون ودھایا ونڄے۔انہاں آکھیا جو پاکستان القاعدہ، داعش، ٹی ٹی پی اَتے ݙوجھے نیٹ ورکس کوں شکست ݙتی، پاکستان دا تجربہ دنیا کیتے ماڈل دے طور تے اپنایا ونڄ سڳدے۔ انہاں آکھیا جو نیشنل ایکشن پلان، ایف اے ٹی ایف قوانین اَتے سرحدی سکیورٹی آپریشنز دی بدولت داخلی سلامتی اچ بہتری آئی۔ بلاول بھٹو بھارت کوں مذاکرات دی میز تے آوݨ، مسئلہ کشمیر دے حل اَتے پاݨی دے مسئلے تے تعاون دی پیشکش کیتی۔ انہاں عالمی برادری توں مطالبہ کیتا جو آؤ پاکستان دیاں افواج، پولیس اَتے عوام دیاں قربانیاں توں سِکھو، اساں نہ صرف دہشت گردی دا مقابلہ کیتا، بلکہ ایں دے خلاف ہک قابل تقلید بیانیہ وی تشکیل ݙتا۔صدر آئی پی آر آئی لیفٹیننٹ جنرل (ر) ماجد احسان کانفرنس نال خطاب کریندے آکھیے جو پاکستان دہشت گردی دے خلاف جنگ بورڈ رومز اچ نئیں میدان جنگ اچ لڑی اے، 90 ہزار توں ودھ قربانیاں دے بعد وی پاکستان عالمی امن کیتے اپݨی جدوجہد ترک نی کیتی۔ انہاں آکھیا جو پاکستان دی انسداد دہشت گردی حکمت عملی صرف عسکری اقدامات تئیں محدود نئیں بلکہ معاشی، سماجی اَتے سفارتی سطح تے وی مربوط اقدامات کیتے ڳئن۔ انہاں آکھیا جو اساں اے جنگ محض بندوق نال نی بلکہ اپݨے خون، قربانی اَتے قومی عزم نال لڑی اے، ہݨ ویلھا آڳئے جو دنیا پاکستان دیاں قربانیاں کوں تسلیم کرے اَتے پاکستان کوں دہشت گردی دے خلاف فرنٹ لائن ریاست تسلیم کیتا ونڄے۔سابق مشیر قومی سلامتی لیفٹیننٹ جنرل (ر) ناصر خان جنجوعہ کانفرنس نال خطاب کریندے آکھیے جو دہشت گردی پاکستان کیتے صرف ہک سکیورٹی چیلنج نی بلکہ ہک قومی آزمائش اے۔ انہاں یاد ݙوایا جو پاکستان 90,000 توں ودھ جاناں قربان کیتیاں اَتے 150 ارب ڈالر توں ودھ دا معاشی ضیان برداشت کیتا، اے صرف ہک ریاستی جنگ نی بلکہ ہک قومی بیانیہ اے۔ ممبر پی وی ای نیکٹا ڈاکٹر خالد چوہان نیشنل ایکشن پلان تے مؤثر عمل درآمد دے نال نال قومی نصاب اچ اصلاحات دی اہمیت تے زور ݙتا۔ ڈاکٹر انیل سلمان کانفرنس اچ معاشی پہلو تے روشنی پیندے آکھیا جو پاکستان ایف اے ٹی ایف دیاں شرطاں تے عمل کریندے منی لانڈرنگ اَتے دہشت گردی دی مالی معاونت دے خلاف مؤثر اقدامات کیتے، پاکستان دیاں مالیاتی اصلاحات بین الاقوامی معیار تے پوریاں لتھیاں لیکن اڄے وی ہنڈی جیڑھے کجھ مسئلے تے مستقل بنیاداں تے قابو پاوݨ دی لوڑھ اے ۔ سابق آئی جی ڈاکٹر سید کلیم امام آکھیا جو دہشت گردی صرف ٻاہروں درآمد شدہ مسئلہ کائنی، بلکہ ملک دے اندرلے عوامل وی ایں کوں ودھارا ݙیندن۔ انہاں پولیس کوں پہلا ردعمل ݙیوݨ آلا ادارہ بݨاوݨ، سرحدی علاقیں اچ مقامی بھرتی اَتے پیشگی انٹیلیجنس مراکز دے قیام دی تجویز ݙتی۔ سوال و جواب سیشن اچ شرکاء قومی ایکشن پلان دی جزئیات، سہولت کاراں دے احتساب، قانون نافذ کرݨ آلے اداریں اچ اصلاحات دے حوالے نال سوال کیتے۔ مقررین جواب اچ موقف اختیار کیتا جو انسدادِ دہشت گردی صرف قانون دا مسئلہ کائنی بلکہ اجتماعی قومی شعور اَتے سیاسی ارادے دا تقاضا اے۔
