اسلام آباد۔ 2 جولائی (اے پی پی) سپیکر قومی اسمبلی سردار ایاز صادق باجوڑ اچ پھاٹک میلہ دے نیڑے تھیوݨ آلے بم دھماکے دی شدید مذمت کیتی اے۔قومی اسمبلی سیکرٹریٹ میڈیا ونگ توں جاری بیان موجب سردار ایاز صادق آکھیا جو دہشت گرد حملہ نہایت بزدلانہ اَتے شرمناک اقدام اے جیں دا مقصد امن و امان کوں سبوتاژ کرݨ اَتے ریاستی عملداری کوں کمزور کرݨا اے۔ انہاں ایں افسوسناک واقعے اچ اسسٹنٹ کمشنر اَتے تحصیلدار نواگئی سودھے ݙوجھے سرکاری اہلکاراں دے جانی نقصان تے ݙکھ اَتے افسوس کیتا ۔ انہاں آکھیا جو پولیس اہلکاراں اَتے سرکاری افسراں تے حملہ ریاست تے حملے دے مترادف اے اَتے ایجھے بزدلانہ اقدامات قوم دے عزم و حوصلے کوں کمزور نئیں کر سڳدے۔سردار ایاز صادق شہداء دے گھرآلیں نلا تعزیت اَتے ہمدردی دا اظہار کریندے آکھیے جو او ایں سانحے اچ متاثرہ خانداناں دے ݙکھ اچ برابر دے شریک ہن۔ انہاں دھماکے دے نتیجے اچ زخمی تھیوݨ آلیں دی صحت یابی کیتے دعا کیتی اَتے ایں عزم دا اظہار کیتا جو ملک دشمن عناصر دے خلاف قومی یکجہتی اَتے عزم نال مقابلہ جاری رکھیا ویسی۔ سپیکر قومی اسمبلی اللہ تعالیٰ توں شہداء دے اُچے درجات اَتے پسماندگان کوں ایں ناقابل تلافی ضیان کوں برداشت کرݨ کیتے صبر جمیل عطا فرماوݨ دی دعا کیتی۔
