سیویل (سپین)۔ 2 جولائی (اے پی پی) وزیر خزانہ سینیٹر محمد اورنگزیب آکھیے جو پاکستان اچ ایس ایم ایز (Small and Medium Enterprises) معیشت دا تقریباً 40 فیصد، برآمدات دا 25 فیصد اَتے غیر زرعی شعبے اچ 78 فیصد ملازمتاں ݙیندن۔اے ڳالھ انہاں سپین اچ چوتھی عالمی کانفرنس فنانسنگ فار ڈویلپمنٹ دے موقع تے انٹرنیشنل بزنس فورم دے زیر اہتمام “ایس ایم ایز کیتے مالی وسائل دی فراہمی اچ توسیع” دے موضوع تے منعقدہ اعلیٰ سطحی مباحثے نال خطاب اچ آکھی ۔ مباحثے نال خطاب کریندے وزیر خزانہ پاکستان دی معیشت اچ ایس ایم ایز دے کردار کوں اہم قرار ݙتا۔ وزیرِ خزانہ ݙسایا جو پاکستان اچ ایس ایم ایز معیشت دا تقریباً 40 فیصد، برآمدات دا 25 فیصد، اَتے غیر زرعی شعبے اچ 78 فیصد ملازمتاں ݙیندن ، ایں دے باوجود انہاں کوں نجی شعبے دے قرضیں دا معمولی حصہ مِلدے جیڑھا ٻہوں گھٹ اے۔وزیر خزانہ آکھیا جو حکومت ہک مربوط پالیسی دے تحت انہاں مسئلیں دا حل کڈھݨ کیتے کم کریندی پئی اے جیں دے تحت 2028 تئیں نجی شعبے دے مجموعی قرضیں اچ ایس ایم ایز دا حصہ 17 فیصد تئیں ودھایا ویسی اَتے ایں کوں خطے دے ݙوجھے ملکاں موجب گھن آیا ویسی ۔ وزیرِ خزانہ ݙسایا جو سٹیٹ بینک دے ذریعے کمرشل بینکاں کوں ایس ایم ای فنانسنگ ودھاوݨ تے آمادہ کیتا ویندا پئے تاں جو معیشت، برآمدات، روزگار، عورتاں و نینگراں دی ڈیجیٹل شمولیت اَتے مالی شمولیت کوں ودھایا ون٘ڄ سڳے۔وزیرِ خزانہ مزید ݙسایا جو وزیراعظم یوتھ، بزنس اَتے ایگری کلچر لون اسکیم دے تحت ارباں روپے دی کریڈٹ گارنٹی سہولت ݙتی ڳئی اے۔ حکومت چھوٹے کاروباراں کوں ݙِتے ڳئے قرضیں تے ممکنہ نقصان دا 50 فیصد تئیں خود برداشت کریسی۔ وزیر خزانہ آکھیا جو قومی ایس ایم ای پالیسی 2021 کوں نویں سروں ترتیب ݙتا ویندا پئے تاں جو اڳلے پنج سالاں سانڳے ہک جامع منصوبہ تیار کیتا ون٘ڄ سڳے۔ ایں دے نال نال سمیڈا کوں وی تکڑا کیتا ویندا پئے تاں جو مارکیٹ تئیں رسائی، ضابطہ جاتی سہولت، مشاورتی خدمتاں اَتے تربیت ݙیوݨ بہتر بݨایا ون٘ڄ سڳے۔ وزیرِ خزانہ آکھیا جو پاکستان ݙوجھے ترقی پذیر ملکاں توں کامیاب ماڈلز سِکھݨ اَتے ٹیکنالوجی، ماحول دوست اَتے سماجی طور تے مربوط ایس ایم ای ترقی کیتے شراکت داری چاہندے ۔ انہاں چھوٹے کاروباراں دی مکمل معاونت اَتے بہتر مالیاتی نظام ݙیوݨ کیتے حکومت دے پکے عزم دا اعادہ کیتا۔
