اقوام متحدہ۔ 2 جولائی (اے پی پی) اقوام متحدہ اچ پاکستان دے سفیر عاصم افتخار احمد آکھیے جو ہݨ ویلھا آ ڳئے جو مسئلہ کشمیر کوں حل کیتا ونڄے ۔ جولائی دے مہینے کیتے اقوام متحدہ دی سلامتی کونسل دی صدارت سنبھالݨ دے بعد گزریل ݙینھ نیویارک اچ اقوام متحدہ دے ہیڈ کوارٹرز اچ پریس کانفرنس نال خطاب کریندے انہاں جھیڑا کشمیر کوں حل کرݨ دی لوڑھ تے زور ݙیندے آکھئے اے مسئلہ بھارت اَتے پاکستان وچال کشیدگی دا باعث بݨدا پئے۔ ہݨ ویلھا آ ڳئے جو ایں (کشمیر دے جھیڑے) کوں حل کیتا ونڄے اے صرف پاکستان دی ذمہ واری کائںی۔ میݙے خیال اچ اے خود سلامتی کونسل اَتے خاص طور تے مستقل ارکان دی ذمے واری اے جو او اپݨیاں قرارداداں کوں عملی جامہ پواوݨ کیتے اقدامات کرن۔انہاں دی پریس کانفرنس توں پہلے 15 رکنی سلامتی کونسل دا اجلاس تھیا جیں اچ جولائی دے مہینے دے کماں دی منظوری ݙتی ڳئی۔ سفیر عاصم افتخار احمد اقوام متحدہ دے نمائندیں کوں ݙسایا جو اساݙا نقطہ نظر اقوام متحدہ دے چارٹر دے مقصد اَتے اصولاں، جھیڑیں دے دے پرامن حل، خودمختار مساوات اَتے بین الاقوامی قانون دا احترام اے۔ انہاں آکھیا جو پاکستان اقوام متحدہ دی سلامتی کونسل دی اپݨی صدارت دے دوران ݙو دستخطی تقریباں کریسی۔ انہاں اچوں ہک اعلیٰ سطحی مباحثہ جیں دا عنوان “کثیر جہتی دے ذریعے بین الاقوامی امن و سلامتی کوں ودھاوݨا اَتے جھیڑیں دا پرامن حل” اے۔ ݙوجھا مباحثہ 24 جولائی کوں او آئی سی اَتے اقوام متحدہ دے تعاون تے اے۔ ݙونہاں مباحثیں دی صدارت نائب وزیراعظم اَتے وزیر خارجہ محمد اسحاق ڈار کریسن۔ ایں دے علاوہ او 23 جولائی کوں فلسطین تے سہ ماہی مباحثے دی صدارت وی کریسن۔پاکستانی سفیر آکھیا جو اساݙی توجہ جھیڑیں دے تصفیہ دے طریقہ کار تے غور کرݨ، کونسل دے فیصلیں تے عمل درآمد دے رستے اچ آندیاں رکاوٹاں تے ڳالھ کرݨ، سفارت کاری، ثالثی اَتے تکنیکی مدد کوں ودھاوݨ دے طریقے ڳولݨ تے جھیڑیں دے حل کیتے مستقبل دے معاہدے اچ کیتے ڳئے وعدیں کوں تقویت ݙیوݨ تے راہسی۔مسئلہ کشمیر تے سفیر عاصم افتخار آکھیا جو سلامتی کونسل دے ایجنڈے اچ شامل سارے ایشوز تے کہیں وی ویلھے ڳالھ کیتی ونڄ سڳدی اے۔ ݙہاکیں پراݨا جھیڑا ایجنڈے اچ شامل اے۔ انہاں آکھیا جو اقوام متحدہ دی سلامتی کونسل کئی قرارداداں اچ اعلان کیتا جو ݙوجھے عناصر دے نال نال کشمیری عوام کوں انہاں دا حق خودارادیت ݙتا ونڄے انہاں آکھیا جو اے ہک سنگین جھیڑا اے، ایں دیاں کئی جہتاں ہن۔ انہاں مزید آکھیا جو اے ہک ایجھا مسئلہ اے جیڑھا حل طلب اے۔ اے ہندوستان اَتے پاکستان وچال تناؤ دی وجہ اے۔ اے خطے اچ دوستانہ تعلقات دے رستے اچ رکاوٹ اے۔ ہݨ ویلھاآڳئے جو ایں تے توجہ ݙتی ونڄے انہاں آکھیا جو سلامتی کونسل مشرق وسطیٰ دی صورتحال اَتے افریقہ، یورپ، ایشیا اَتے لاطینی امریکہ اچ پیش رفت سودھے اہم عالمی مسائل تے توجہ ݙٰیسی ۔ سلامتی کونسل دی صدارت ہر مہینے ایں دے 15 ارکان وچال حروف تہجی دی ترتیب نال ہوندی اے۔ پاکستان اقوام متحدہ دے ممبران دی زبردست حمایت نال غیر مستقل رکن دے طور تے منتخب تھئے اَتے ایں کوں 193 اچوں 182 ووٹ مِلئن۔
