اسلام آباد۔ 3 جولائی (اے پی پی) ایئرچیف مارشل ظہیر احمد بابر سدھو سپیکر قومی اسمبلی سردار ایاز صادق دے پارلیمانی کردار دی تعریف کریندیں ہوئیں آکھیا جو قومی اسمبلی دے معزز ارکان دی پاک فضائیہ دے حق اچ یکجہتی قابل فخر اے، بھارتی جارحیت دے خلاف قومی یکجہتی قائم کرݨ کیتے انہاں دا کردار قابل ستائش اے۔ خمیس کوں قومی اسمبلی سیکرٹریٹ ولوں جاری پریس ریلیز موجب ایئرچیف مارشل ظہیر احمد بابر سدھو سپیکر قومی اسمبلی سردار ایاز صادق دے ناں اظہار تشکر دا خط ٻھیجے جئیں اچ انہاں سپیکر قومی اسمبلی دے پارلیمانی کردار دی تعریف کیتی اے۔انہاں آکھیا جو بھارتی جارحیت دے خلاف قومی یکجہتی قائم کرݨ کیتے سپیکر سردار ایاز صادق دا کردار قابل ستائش اے، قومی اتحاد دے مظاہرے تے پاک فضائیہ پارلیمانی قیادت دی شکر گزار اے۔ انہاں آکھیا جو قومی اسمبلی دے معزز ارکان دی پاک فضائیہ دے حق اچ یکجہتی قابل فخر اے، دشمن دی جارحیت دا مؤثر جواب ݙیوݨ تے پارلیمانی تے قومی قیادت ولوں خراج تحسین ناقابل فراموش اے، پاک فضائیہ دی کامیابی ربِ کریم دی خاص عنایت اتے قومی اتحاد تے یکجہتی دا نتیجہ اے۔ ایئر چیف مارشل ظہیر احمد بابر سدھو آکھیا جو قومی اتحاد تے یکجہتی دشمن دے ناپاک عزائم کوں خاک اچ ملا ݙتا، قوم دی حمایت نال مسلح افواج ہر چیلنج نال نبڑݨ دی بھرپور صلاحیت رکھیندن، پاک فضائیہ ملکی سرحداں دے دفاع کیتے ہر ویلھے تیار اے۔ انہاں آکھیا جو پاک فضائیہ ملکی سرحداں دی حفاظت کوں آپݨی مقدس ذمہ واری سمجھدی اے۔ ایئر چیف مارشل ظہیر احمد بابر سدھو قومی اہداف دی تکمیل کیتے ہر ممکن تعاون جاری رکھݨ دے عزم کیتا۔واضح رہے جو ایئر چیف مارشل دا خط سپیکر قومی اسمبلی دے خط دے جواب اچ لکھیا ڳئے۔ سپیکر قومی اسمبلی بھارتی جارحیت دا مُونہہ ٻھن جواب ݙیوݨ تے فیلڈ مارشل جنرل سید عاصم منیر اتے ایئر چیف مارشل ظہیر احمد بابر سدھو کوں خطوط ٻھیجن۔ خطوط اچ مسلح افواج بالخصوص پاک فضائیہ دی غیر معمولی جرات، بہادری، مہارت، اتے پیشہ ورانہ صلاحیتاں کوں خراج تحسین پیش کیتا. سپیکر قومی اسمبلی آپݨے خط اچ پارلیمان ولوں مسلح افواج دے نال غیر متزلزل حمایت اتے یکجہتی دا اظہار کیتا۔
