اسلام آباد۔ 3 جولائی (اے پی پی) وزیراعظم محمد شہباز شریف آکھیا جو معیشت اچ شفافیت کیتے ڈیجیٹل ٹرانزیکشن سسٹم ضروری اے، شہریاں اتے کاروباری اداریاں وچال ادائیگیاں کوں سوکھا بݨاوݨ اَتے ڈیجیٹل سسٹم دے استعمال بارے آگاہی ودھاوݨ ویلھے دی اہم لوڑھ اے، کیش لیس اکانومی بارے قائم کمیٹیاں سارے شراکت داراں نال رَل تے قابل عمل تجاویز پیش کرن۔ خمیس کوں وزیراعظم میڈیا آفس توں جاری بیان موجب وزیراعظم شہباز شریف صدارت اچ کیش لیس تے ڈیجیٹل معیشت بارے ہفتہ وار اجلاس تھیا۔ وزیراعظم کوں بریفنگ اچ ݙسیا ڳیا جو گزریل اجلاس اچ ٻݨائی ڳئی ݙیجیٹل پےمنٹس انوویشن اینڈ ایڈاپشن کمیٹی، ڈیجیٹل پبلک انفراسٹرکچر کمیٹی اَتے گورنمنٹ پےمنٹس کمیٹی تشکیل ڈیتی ڳئن۔ اجلاس اچ ڈیجیٹل پےمنٹس انوویشن اینڈ ایڈاپشن بارے بݨائی ڳئی کمیٹیاں معیشت دی ڈیجیٹلائزیشن بارے تجاویز اتے حکمت عملی تے بریفنگ ݙتی۔وزیراعظم کوں ݙسیا ڳیا جو ڈیجیٹل ادائیگیاں کوں فروغ ݙیوݨ بارے سٹیٹ بینک آف پاکستان تاجراں کیتے ڈیجیٹل ادائیگیاں دے طریقہ کار کوں سوکھا اتے سہل بݨاوݨ کیتے حکمت عملی ٻݨیندا پئے۔ ڈیجیٹل ادائیگیاں اچ نِکّے کاروباراں دی حوصلہ افزائی اَتے شمولیت کیتے سوکھا پیکج متعارف کرایا ویسی۔ ڈیجیٹل ادائیگیاں کیتے موبائل فون ایپلیکیشناں استعمال کرݨ آلیاں دی تعداد 95 ملین توں 120 ملین تئیں گھن ونڄݨ دا ہدف اے، کیو آر کوڈ استعمال کرݨ آلے تاجراں دی تعداد 0.9 ملین توں 2 ملین تئیں گھن ونڄݨ دا ہدف اے، مجموعی ڈیجیٹل ادائیگیاں کوں 7.5 بلین روپے توں 12 بلین روپے تئیں ودھایا ویسی۔”ڈیجیٹل نیشنل پاکستان” بارے ڈیجیٹل اکانومی پروجیکٹ شروع تھی ڳئے۔ اسلام آباد سٹی موبائل فون ایپلیکیشن دے ہݨ تئیں 1.3 ملین ڈاؤنلوڈز ہن جݙاں جو ایں ایپلیکیشن تے 15 سروسز موجود ہن۔ اسلام آباد سٹی ایپ دے ذریعے آئی سی ٹی ایکسائز اینڈ ٹیکسیشن دی مد اچ 15.5 بلین روپے جمع کیتے ڳئن۔ ڈیجیٹل پاکستان آئی ڈی منصوبے دی تکمیل کیتے تکڑی نال کم جاری اے۔ اسلام آباد اچ ای-سٹیمپنگ دی سہولت جلدی متعارف کروائی ویندی پئی اے۔ اسلام آباد اچ، خاص طور تے ہسپتالاں، تعلیمی اداریاں، سرکاری دفتراں، پارکس اَتے میٹرو بس لائناں تے وائی فائی انٹرنیٹ دی سہولت دی فراہمی بارے کم جاری اے۔ وزیراعظم سارے اہداف کوں ݙوگنا کرݨ دی ہدایت کیتی اَتے ساریاں سہولتاں سارے وفاقی علاقے، آزاد جموں کشمیر اَتے گلگت بلتستان اچ وی متعارف کراوݨ دے احکامات ݙِتے۔ اجلاس دے شرکاء نال گالھ مہاڑ کریندیں ہوئیں وزیراعظم آکھیا جو معیشت اچ شفافیت گھن آوݨ کیتے ڈیجیٹل ٹرانزیکشن سسٹم ضروری اے، شہریاں اتے کاروباری اداریاں وچال ادائیگیاں کوں سوکھا بݨاوݨ اَتے ڈیجیٹل سسٹم دے استعمال بارے آگاہی ودھاوݨ ویلھے دی اہم لوڑھ اے۔ انہاں ہدایت کیتی جو کیش لیس اکانومی بارے ٻݨائی ڳئی کمیٹیاں سارے شراکت داراں نال رَل تے قابل عمل تجاویز پیش کرن۔ اجلاس اچ وفاقی وزیر انفارمیشن ٹیکنالوجی تے ٹیلی کام شزا فاطمہ، وفاقی وزیر پٹرولیم علی پرویز ملک، وزیراعظم دے مشیر ڈاکٹر توقیر شاہ، وزیر مملکت برائے خزانہ تے ریلوے بلال اظہر کیانی اَتے متعلقہ اعلیٰ سرکاری افسراں شرکت کیتی۔
