ملک توں پولیو دے مکمل خاتمے کیتے پُرعزم ہیسے، پولیو ورکرز دی حفاظت پہلی ترجیح اے، وزیراعظم شہباز شریف دا انسداد پولیو ٹاسک فورس دے اجلاس توں خطاب

اسلام آباد۔ 3 جولائی (اے پی پی) وزیراعظم محمد شہباز شریف انسداد پولیو کیتے کوششاں ٻئی تیز کرݨ تے زور ݙیندیں ہوئیں آکھیا جو ملک توں پولیو دے مکمل خاتمے کیتے پُرعزم ہیسے، پولیو ورکرز دی حفاظت اساݙی پہلی ترجیح اے، صوبائی حکومتاں سودھے سارے متعلقہ فریقاں کوں پولیو دے خاتمے کیتے ہک جان تھی تے کم کرݨا پوسی۔ خمیس کوں وزیراعظم آفس دے میڈیا ونگ توں جاری بیان موجب وزیراعظم محمد شہباز شریف دی صدارت انسداد پولیو دی ٹاسک فورس دا اجلاس تھیا۔ اجلاس اچ انسداد پولیو اوور سائٹ بورڈ دے صدر تے صدر گلوبل ڈیویلپمنٹ، گیٹس فاؤنڈیشن ڈاکٹر کرسٹوفر ایجیس دی قیادت وچ پولیو اوور سائٹ بورڈ دے ارکان شرکت کیتی۔اجلاس اچ وزیراعظم آکھیا جو ساریاں مشکلات اتے چیلنجز دے باوجود حکومت آپݨی بین الاقوامی اتے صوبائی، مقامی ساریاں ٹیماں دی مدد نال پاکستان توں انسداد پولیو دے ہدف کوں جلدی حاصل کر ڳِھنسی. “اساں پاکستان دے ہر ٻال کوں پولیو سویں موذی مرض توں بچاوݨ اَتے پولیو فری پاکستان دا عزم کریندوں۔” وزیراعظم آکھیا ایں سانگے پوری لگن اتے سنجیدگی نال ایں امر کوں یقینی بݨاوݨا چاھیدے جو ملک دے ہر ٻال کوں ویکسین دی کئی خوراکاں ملن اَتے او پولیو توں محفوظ رہے۔انہاں آکھیا جو فرنٹ لائن ورکرز دی لگن، حکومت پاکستان دے عزم اتے پارٹنرز دے تعاون نال پاکستان پولیو دے خلاف اہم پیش رفت کیتی اے۔ وزیراعظم آکھیا جو انسداد پولیو کیتے صوبائی، گلگت بلتستان اَتے آزاد کشمیر دی حکومتاں اتے قانون نافذ کرݨ آلے اداریاں دی کوششاں اتے تعاون قابل تحسین ہن۔ انہاں ٻیا آکھیا جو پولیو ورکرز دی حفاظت اساݙی پہلی ترجیح اے، صوبائی حکومتاں سودھے سارے متعلقہ فریقاں کوں پولیو دے خاتمے کیتے ہک جان تھی تے ٻئی تیزی نال کم کرݨا پوسی۔وزیراعظم آکھیا جو اساں آپݨے سارے سانجھے داراں دے شکر گزار ہیسے جو پولیو دے خاتمے بارے حکومت دا بھرپور ساتھ ݙیندے پئن۔ “سعودی ولی عہد تے وزیراعظم محمد بن سلمان دا وی شکر گزار ہاں جو او انسداد پولیو وچ پاکستان دا ہر طرحاں نال ساتھ ݙیندے پئن۔” انہاں آکھیا جو پاکستان اچ انسداد پولیو مہم وچ بل گیٹس فاؤنڈیشن سودھے سارے شراکت داراں بہوں اہم اتے قابل تحسین کردار ادا کیتے۔اجلاس کوں انسداد پولیو بارے بریفنگ ݙتی ڳئی۔ اجلاس کوں ݙسیا ڳیا جو جنوبی خیبرپختونخوا دے علاقیاں اچ پولیو وائرس دے مکمل خاتمے کیتے ہر ضلع اچ پیش آوݨ آلے مسئلیاں دی نسبت نال مخصوص انسداد پولیو مہم تشکیل ݙتی ویندی پئی اے۔ پاکستان اچ انسداد پولیو مہم نہ صرف ٻالڑیاں اچ پولیو کیسز بلکہ ایں دی ماحولیاتی موجودگی کوں ختم کرݨ وچ وی کوشاں ہن۔پولیو اوور سائٹ بورڈ دے ارکان اچ ریجنل ڈائریکٹر عالمی ادارہ صحت ڈاکٹر حنان بلخی، یونیسیف دے ریجنل ڈائریکٹر سنجے وجے سکیرا، کے ایس ریف ن سعودی عرب دے ڈاکٹر زیاد میمیش، روٹری انٹرنیشنل دے مائیک میکگورن اتے ٹرسٹی روٹری دے عزیز میمن شامل ہن۔ اجلاس اچ وفاقی وزیر قومی صحت سید مصطفی کمال، وزیر مملکت برائے قومی صحت ڈاکٹر مختار احمد بھراتھ، انسداد پولیو تے وزیراعظم دی فوکل پرسن عائشہ رضا فاروق، چاراں صوبیاں، گلگت بلتستان، آزاد کشمیر دے چیف سیکریٹریز، اسلام آباد کیپیٹل ٹیریٹری دے چیف کمشنر، انسداد پولیو دے نیشنل کوآرڈینیٹر اتے ݙوجھے متعلقہ اعلیٰ سرکاری افسراں شرکت کیتی۔