اسلام آباد۔ 3 جولائی (اے پی پی) وفاقی وزیر منصوبہ بندی، ترقی و خصوصی اقدامات پروفیسر احسن اقبال دی صدارت وچ پبلک پرائیویٹ پارٹنرشپ اتھارٹی (پی تھری اے) دے بورڈ آف ڈائریکٹرز دا 39واں اجلاس اسلام آباد وچ تھیا۔ اجلاس دے دوران وفاقی وزیر مالیاتی چیلنجز تے قابو پاوݨ، منصوبیں دی وختی تکمیل یقینی بݨاوݨ اَتے بنیادی ڈھانچے و عوامی خدمات ݙیوݨ اچ بہتری گھن آوݨ کیتے نجی شعبے دی سرمایہ کاری، جدت اَتے انتظامی صلاحیتاں توں بھرپور فیدہ چاوݨ دی اہمیت تے زور ݙتا۔وفاقی وزیر آکھیا جو “پبلک پرائیویٹ پارٹنرشپس اساݙے انفراسٹرکچر دی ترقی دی حکمت عملی دا بنیادی ستون ہن۔ اساں نجی سرمایہ اَتے مہارت کوں استعمال وچ گھن آتےنہ صرف اہم قومی منصوبیں دی رفتار کوں تکھا کریندے پیوں بلکہ شفافیت، دیرپا ترقی اَتے عوامی وسائل دے مؤثر استعمال کوں وی یقینی بݨیندے پئن۔اجلاس اچ بورڈ کئی اہم انفراسٹرکچر منصوبیں دی منظوری ݙتی جیڑھے پبلک پرائیویٹ پارٹنرشپ ماڈل دے تحت مکمل کیتے ویسن۔ اِنہاں وچ اسلام آباد وچ شہری پاݨی اَتے نکاسی آب دے منصوبیں کیتے بین الاقوامی مالیاتی ادارے (آئی ایف آئی) دی بطور ٹرانزیکشن ایڈوائزر تقرری دی منظوری شامل ہئی جو ڈائریکٹ کنٹریکٹنگ ریگولیشنز 2023 دے تحت عمل وچ آئی۔ ایں اقدام دا مقصد تکنیکی طور تے پیچیدہ اَتے ماحولیاتی لحاظ نال مضبوط میونسپل منصوبیں دی منصوبہ بندی و نفاذ کیتے عالمی مہارت حاصل کرݨا اے۔بورڈ 69 کلومیٹر طویل سیالکوٹ-کھاریاں موٹر وے منصوبے دے نظرثانی شدہ کمرشل سٹرکچر دی اصولی منظوری وی ݙتی، جیڑھا جو وزارت خزانہ دی منظوری نال مشروط اے۔ اے منصوبہ سپیشل انویسٹمنٹ فیسلیٹیشن کونسل (ایس آئی ایف سی) دی ہدایت چھی رستہ شاہراہ وچ اپ گریڈ کیتا ڳئے اَتے اے سیالکوٹ کوں مرکزی پنجاب نال M-12 راہداری دے ذریعے جوڑݨ کیتے کلیدی اہمیت رکھیندے ۔ ایں نال صنعتی نقل و حرکت اَتے رسائی وچ نمایاں بہتری دی توقع اے۔ایں توں انڄ بورڈ کھاریاں-راولپنڈی موٹر وے منصوبے دی منظوری وی ݙتی جیڑھی جو 117.6 کلومیٹر طویل چھی رستہ گرین فیلڈ موٹر وے ہوسی اَتے اوں کوں “بلڈ-آپریٹ-ٹرانسفر” (بی او ٹی) ماڈل دے تحت مکمل کیتا ویسی۔ ایں منصوبے دی تخمینہ لاگت 202.61 ارب روپے اے جݙاں جو 40 ارب روپے دی وائبلٹی گیپ فنڈنگ دی تجویز ݙتی ڳئی اے۔ منصوبہ بین الاقوامی مسابقتی ٻولی دے ذریعے حاصل کیتا ویسی اَتے اوں کوں ایس آئی ایف سی دے تحت ترجیحی منصوبیں وچ شامل کیتا ڳئے۔ ایں موٹر وے نال شمالی اتے وسطی پنجاب وچال سفر دا ویلھا گھٹ ہوسی اَتے تجارتی و مسافرانہ آونڄ وچ وی بہتری آسی۔ ایں عزم دا اعادہ کیتا ڳئے جو او پاکستان دے وسیع تر اقتصادی اصلاحاتی اتے ترقیاتی ایجنڈے دے تحت پبلک پرائیویٹ پارٹنرشپ فریم ورک دے ذریعے ترجیحی انفراسٹرکچر منصوبیں دی تکھی رفتار تکمیل کوں یقینی بݨیسی۔اجلاس وچ بورڈ ممبران جِنھاں وچ وزارت منصوبہ بندی، ترقی و خصوصی اقدامات دے سیکریٹری، وزارت خزانہ دے نمائندے، بورڈ دے نجی ارکان اَتے پی تھری اے دے چیف ایگزیکٹو آفیسر اتے انہاں دی ٹیم شامل ہن شرکت کیتی۔ خصوصی مدعو لوکاں وچ پلاننگ کمیشن دے ممبر (پی ایس ݙی اینڈ سی) اَتے ممبر (انفراسٹرکچر و علاقائی رابطے)، چیئرمین نیشنل ہائی وے اتھارٹی (این ایچ اے) اَتے چیئرمین کیپیٹل ݙیولپمنٹ اتھارٹی (سی ڈی اے) شامل ہن۔
