خانکندی۔ 4 جولائی (اے پی پی) وزیراعظم محمد شہباز شریف آذربائیجان دے شہر خانکندی وچ 17ویں اقتصادی تعاون تنظیم (ای سی او) سربراہی اجلاس دے موقع تے ایران دے صدر ڈاکٹر مسعود پیزشکیان نال ملاقات کیتی۔ وزیراعظم دفتر دے میڈیا ونگ توں جاری پریس ریلیز موجب ، ملاقات اچ ݙوہیں رہنماواں پاکستان اَتے ایران وچال سارے شعبیں وچ جاری ݙو طرفہ تعاون دا جائزہ ڳِھدا اَتے پاک ایران تعلقات کوں مزید تکڑا بݨاوݨ کیتے اپݨی گزریل ملاقات دے دوران کیتے ڳئے فیصلیں تے تھیوݨ آلی پیش رفت تے اطمینان دا اظہار وی کیتا۔ ݙوہیں رہنماواں ایران دے خلاف اسرائیل دی بلاوجہ جارحیت دے تناظر وچ اُبھرݨ آلی علاقائی صورتحال تے وی گالھ مہاڑ کیتی۔وزیراعظم ایرانی صدر ڈاکٹر مسعود پیزشکیان دی قیادت دی تعریف کیتی تے اڄوکے بحران دے دوران ایران دے جنگ بندی دے فیصلے دی تعریف کیتی ۔ وزیراعظم ایران دے عوام اَتے حکومت دے نال پاکستان دی غیر متزلزل یکجہتی کوں دہریندے خطے وچ امن کیتے مذاکرات اَتے سفارتکاری دے ذریعے ایران دے نال رَل تے کم جاری رکھݨ دے پاکستان دے پکے عزم دا اعادہ کیتا۔ ملاقات اچ ایرانی صدر ڈاکٹر مسعود پیزشکیان اڄوکے بحران دے دوران عالمی فورمز سودھے ایران کیتے پاکستان دی مضبوط سفارتی حمایت دی تعریف کیتی تے جھیڑے کوں گھٹ کرݨ وچ پاکستان دے اہم کردار تے اظہار تشکر کیتا۔ وزیراعظم ایرانی صدر کوں ایرانی سپریم لیڈر کیتے مبارخ اَتے نیک خواہشات دا پیغام وی ݙتا۔
