اسلام آباد۔ 4 جولائی (اے پی پی) وفاقی وزیر منصوبہ بندی، ترقی و اصلاحات پروفیسر احسن اقبال دی زیر صدارت نیشنل پرائس مانیٹرنگ کمیٹی دا اہم اجلاس منعقد تھیا جیں وچ ملک وچ مہانگ دی موجودہ صورتحال، ضروری چیزاں دیاں قیمتاں اَتے صوبائی حکومتاں ولوں پرائس سکور کارڈ دے استعمال دا تفصیلی جائزہ ڳِھدا ڳیا۔چیف شماریات کمیٹی کوں ݙسائے مالی سال 2024-25 دے دوران ملک وچ مہانگ دی شرح 4.5 فیصد ریکارڈ کیتی ڳئی جیڑھی گزریل سال دی 23.4 فیصد مہانگ دے مقابلے وچ نمایاں کمی اے۔ اے گزریل 9 سالاں دی گھٹ توں گھٹ شرح مہانگ اے ۔ شہری علاقیں وچ کھاوݨ پیوݨ دیاں چیزاں اچ مہانگ دی شرح 4.2 فیصد رہی جیڑھی گزریل سال دی 2.6 فیصد دے مقابلے وچ کجھ ودھ اے۔ چیف شماریات سندھ وچ ہائی وے دی بندش کوں فوڈ سپلائی متاثر تھیوݨ دی وݙی وجہ قرار ݙتا۔اجلاس وچ ݙسایا ڳیا جو ایل پی جی، کیلے، سرئم دا تیل، چݨے اَتے مونگیں دی دال دی قیمتاں وچ کمی واقع تھئی اے جݙاں جو کھنڈ دیہ قیمت تقریباً سارے شہراں وچ 190 روپے فی کلو تئیں پُڄ ڳئی اے۔ کھنڈ دی پیداوار وچ ہک ملین ٹن دی کمی واقع تھئی اے جیں دے نتیجے وچ سال 2025ء وچ مجموعی پیداوار 5.8 ملین ٹن رہی۔ وزارت خوراک ایں کمی کوں پورا کرݨ کیتے پنج لکھ ٹن کھنڈ درآمد کرݨ دا فیصلہ کیتے۔اجلاس وچ پرائس سکور کارڈ دے استعمال تے وی تفصیلی غور کیتا ڳئے۔ احسن اقبال خیبرپختونخوا دے چیف سیکرٹری ولوں 114 واری پرائس سکور کارڈ لاگ ان کرݨ تے تعریف کیتی جݙاں جو سندھ دے چیف سیکرٹری صرف 10 واری، پنجاب دے چیف سیکرٹری 6 واری اَتے بلوچستان دے چیف سیکرٹری ھک واری وی نہ ۔ ڈی سی اسلام آباد 27 واری، کراچی 6 واری تے کوئٹہ 4 واری سکور کارڈ چیک کیتا۔وفاقی وزیر اظہار افسوس کیتا جو صوبائی حکومتاں مہانگ کوں کنٹرول کرݨ کیتے دستیاب ڈیجیٹل نظام توں مؤثر فیدہ نی چیندیاں پیاں انہاں پاکستان بیورو آف سٹیٹسٹکس کوں ہدایت کیتی جو ہر مہینے چیف سیکرٹریز کوں پرائس سکور کارڈ تے لاگ ان دی رپورٹ ارسال کیتی ونڄے تاں جو نگرانی دے عمل کوں مزید مؤثر بݨایا ونڄ سڳے۔ احسن اقبال ہدایت کیتی جو اڳلے رمضان کیتے کھاوݨ پیوݨ دیاں چیزاں دی سپلائی اَتے ڈیمانڈ دا منصوبہ ہݨے بݨایا ونڄے تاں جو عوام کوں ریلیف ݙتا ونڄ سڳے ۔ انہاں ایں ڳالھ تے اطمینان دا اظہار کیتا جو عید الاضحیٰ دے موقع تے اشیائے خوردونوش دی قیمتاں وچ استحکام رہیا۔ انہاں سارے ڈپٹی کمشنرز کوں ہدایت کیتی جو ہول سیل اَتے ریٹیل قیمتاں دا باقاعدگی نال موازنہ کرتے وختی کارروائی کرن اَتے صوبائی حکومتاں انہاں دی نگرانی دا مؤثر نظام بݨاون۔
