اسلام آباد۔ 6 جولائی (اے پی پی) صدر مملکت آصف علی زرداری آکھیے جو یومِ عاشورہ اسلامی تاریخ دا ہک درخشاں اَتے لازوال باب اے، جو اساکوں قربانی، حق گوئی اَتے عزمِ صمیم دا پیغام ݙیندے۔ اے ݙینھ نواسۂ رسولؐ، حضرت امام حسین رضی اللہ عنہ اَتے انہاں دے جانثار رفقاء دی عظیم شہادت دی یاد ݙویندے، جیڑھا باطل دے خلاف ہک ابدی جدوجہد دی علامت اے۔ایوان صدر دے پریس ونگ موجب صدر آصف علی زرداری یوم عاشورہ 1447ھ دے موقع تے قوم دے ناں پیغام وچ آکھیے جو اے ݙینھ نہ صرف قربانی، وفا اَتے صبر دی ہک بے مثال داستان اے بلکہ ہک روشن چراغ وی اے جیڑھا ہر دور دے اندھاریں وچ حق اَتے سچائی دا رستہ ݙکھیندے۔ امامِ عالی مقام دی شہادت کہیں وی سیاسی یا وقتی مصلحت دا نتیجہ نہ ہئی بلکہ اِے ہک الٰہی مشن ہئی جیں دی بنیاد صداقت، عدل اَتے خدا دی رضا ہئی۔ انہاں آکھیا جو کربلا دی سرزمین تے صرف ہک جنگ نئیں لڑی ڳئی، بلکہ اتھاں ضمیر، کردار اَتے دین دی اصل روح دا امتحان ہئی۔صدر مملکت آکھیا جو امام حسین رضی اللہ عنہ اَتے انہاں دے جانثاراں بھُک، تریھ اَتے موت دی شدت کوں قبول کر تے تاریخِ انسانیت کوں او سبق ݙتے جیں کوں زمانہ کݙاہیں وی بھُل نئیں سڳدا۔ انہاں دا پیغام اڄ وی زندہ اے اَتے اے اصولاں تے ڈٹّ ونجݨ دا، ظلم و جبر دے سامݨے نہ جُھکݨ دا اَتے حق دی خاطر ہر قربانی ݙیوݨ دا عظیم پیغام اے۔صدر مملکت آکھیا جو اڄ جے اساں اپݨے ملک کوں درپیش چیلنجز تے غور کروں تاں محسوس تھیسی جو اساکوں بطور قوم حسینی کردار دی سخت لوڑھ اے۔ اساکوں امام حسین رضی اللہ عنہ دے رستے تے چلیندے نہ صرف اپݨے نفس دی اصلاح کرݨی اے بلکہ اپݨے نظامِ حکمرانی، سماجی رویں، اَتے قومی ترجیحات کوں وی ایمانداری، شرافت اَتے فلاحِ عامہ تے استوار کرݨا اے۔صدر آصف علی زرداری آکھیا جو اساکوں اڄ اے عہد کرݨا اے جو پاکستان کوں امام حسین رضی اللہ عنہ دے پیغامِ حریت اَتے عدل دا مظہر بݨیسوں اَتے بھرپی ، محبت، رواداری اَتے قومی یکجہتی کوں ودھارا ݙیسوں ۔ میڈی اللہ رب العزت توں دعا اے جو او اساکوں امام حسین رضی اللہ عنہ دے رستے تے چلݨ دی توفیق عطا فرماوے۔ اساݙے دلاں وچ غیرت ایمانی، جرأت، تقویٰ، صبر و ایثار پیدا فرماوے اَتے اساݙے ملک پاکستان کوں استحکام، خوشحالی اَتے سانجھی محبت دا گہوارہ بݨاوے، آمین
