اسلام آباد۔ 6 جولائی (اے پی پی) وزارت داخلہ دے ترجمان آکھیے جو یوم عاشور تے پورے ملک وچ اڄ 4836 جلوس کݙھے ویندے پئن، 5480 مجالس تھیسن اَتے 1301 علاقے انتہائی حساس قرار ݙتے ڳئن۔ ترجمان وزارت داخلہ اتوار کوں جاری بیان وچ ݙسایا جو وفاقی وزیر داخلہ محسن نقوی دی ہدایت تے اسلام آباد وچ مرکزی مانیٹرنگ سیل دا صوبائی حکومتاں دے کنٹرول رومز نال مسلسل رابطہ اَتے اطلاعات دا تبادلہ کیتا ویندا پئے۔ترجمان وزارت داخلہ موجب ، وزیر داخلہ محسن نقوی، وزیر مملکت طلال چوہدری اَتے سیکرٹری داخلہ خرم آغا لمحہ بہ لمحہ صورتحال کوں مانیٹر کریندے پئن۔ وزیراعظم محمد شہباز شریف کوں ملک اچ امن و امان دی صورتحال توں مسلسل اپ ڈیٹ کیتا ویندا پئے۔ترجمان وزارت داخلہ آکھیا جو اسلام آباد سودھے پنجاب، خیبرپختونخوا، بلوچستان، سندھ، آزاد کشمیر و گلگت بلتستان وچ یوم عاشور تے سخت ترین حفاظتی اقدامات کیتے ڳئن۔ اسلام آباد وچ اڄ 54 مجالس اَتے 12 جلوس جݙاں جو پنجاب وچ 2502 مجالس اَتے 3025 جلوس کݙھے ویندے پئن۔ سندھ وچ عزادار 1040 مجالس اَتے 1039 جلوس اَتے خیبرپختونخوا وچ 735 مجالس و 257 جلوس کݙھیے ڳئن ۔ بلوچستان وچ 32 مجالس، 24 جلوس، گلگت بلتستان وچ 1070 مجالس، 141 جلوس اَتے آزاد کشمیر وچ 47 مجالس، 41 جلوس منعقد تھیسن۔وزیر داخلہ محسن نقوی آکھیا جو 9ویں محرم وانڳوں یوم عاشور تے وی امن و امان کیتے ساریاں فورسز اَتے انتظامیہ ہائی الرٹ ہن۔ سوشل میڈیا تے مذہبی منافرت اَتے فرقہ واریت تے کریک ڈاؤن جاری اے۔ محسن نقوی آکھیا جو یوم عاشور تے مؤثر اقدامات کیتے ڳئن۔ انشاء اللہ عاشورہ محرم بخیر و عافیت گزر ویسی۔ وزیر داخلہ آکھیا جو فوج، رینجرز، پولیس، انتظامیہ اَتے ݙوجھے اداریں کوں خراج تحسین پیش کرینداں۔
