باکو۔ 9 جولائی (اے پی پی) سپیکر قومی اسمبلی سردار ایاز صادق دی قیادت اچ پارلیمانی وفد آذربائیجان دے وزیراعظم علی اسدوف نال باکو اچ ملاقات کیتی۔بدھ کوں قومی اسمبلی سیکرٹریٹ ولوں جاری بیان موجب ملاقات اچ سپیکر سردار ایاز صادق صدر الہام علیوف اَتے سپیکر صاحبہ غفارووا نال اڄوکی ملاقاتاں کوں مثبت اَتے تعمیری قرار ݙتا۔ سپیکر سردار ایاز صادق ای سی او سربراہی اجلاس دے کامیاب انعقاد تے وزیراعظم آذربائیجان کوں مبارخ ݙتی۔ سپیکر قومی اسمبلی سردار ایاز صادق آکھیا جو وزیراعظم شہباز شریف دی ای سی او اجلاس اچ شرکت ݙوہیں ملکاں اچ یکجہتی اَتے خیر سگالی دی علامت اے۔انہاں مسئلہ کشمیر بارے پاکستان دے موقف دی غیر متزلزل حمایت تے آذربائیجان دا شکریہ کریندیں ہوئیں آذربائیجان ولوں پاکستان اچ 2 ارب ڈالر دی سرمایہ کاری دے اعلان دا خیر مقدم کیتا۔ سپیکر قومی اسمبلی ݙوہیں برادر ملکاں دی پارلیماناں اچ رابطیاں کوں فروغ ݙیوݨ دی لوڑھ تے زور ݙیندیں ہوئیں ایں سال ستمبر اچ اسلام آباد اچ سہ فریقی سپیکرز کانفرنس دی میزبانی دی تجویز پیش کیتی۔ملاقات اچ آذربائیجان دے وزیراعظم علی اسدوف کشمیر تے آذربائیجان دے اصولی موقف دا اعادہ کیتا اَتے پاکستان ولوں نگورنو کاراباخ تنازعہ تے حمایت تے پاکستان دا شکریہ ادا کیتا۔ وزیراعظم علی اسدوف آکھیا جو آذربائیجان آپݨی خودمختاری اَتے علاقائی سالمیت تے کوئی سمجھوتہ نہ کریسی۔ ملاقات اچ ݙوہیں ملکاں وچال (پی ٹی اے) ترجیحاتی تجارتی معاہدہ دے نفاذ دا خیر مقدم کیتا ڳیا۔
