پاکستان تہذیباں دے سنگم تے واقع قوم اے، سی پیک تہذیباں کوں جوڑݨ دا راہ اے، مستقبل ڈیجیٹل رابطیاں اچ دے، ڈیجیٹل میڈیا اساݙی نویں راہداری اے، عطاء اللہ تارڑ

بیجنگ۔ 11 جولائی (اے پی پی) وفاقی وزیر اطلاعات تے نشریات عطاء اللہ تارڑ آکھیا ہے جو پاکستان ہک ایجھی قوم اے جو تہذیباں دے سنگم تے واقع اے، سی پیک تہذیباں کوں جوڑݨ دا راہ اے، اساں موہنجو داڑو اَتے ٹیکسلا جیھاں تاریخی ورثیاں دے وارث ہیسے، اِے او تہذیباں ہن جو محض تاریخ دا باب نئیں بلکہ اساݙے شعور، ہنر اَتے نوجواناں دے افکار وچ زندہ ہن، حکومت ثقافت اَتے ورثے دی ڈیجیٹلائزیشن دا عمل شروع کر ݙتے، مستقبل ڈیجیٹل رابطیاں اچ اے، ڈیجیٹل میڈیا اساݙی نویں راہداری اے، عالمی تہذیبی اقدام دا وژن پیش کرݨ تے صدر شی جن پنگ کوں خراج تحسین پیش کریندوں۔اے ڳالھیں انہاں جمعہ کوں اتھاں “سولائزیشن ایکسچینج اینڈ میوچل لرننگ – ثقافتی وراثت اَتے جدت” دے موضوع تے تھیوݨ آلے فورم نال خطاب کریندیں ہوئیں کیتی۔ وفاقی وزیر اطلاعات فورم اچ شریک عالمی رہنماواں، ماہرین اَتے محققین دے سامݨے پاکستان اَتے چین دے تاریخی، ثقافتی اَتے تہذیبی رابطیاں کوں اجاگر کیتا۔ انہاں آکھیا جو اڄ ایں فورم وچ اسلامی جمہوریہ پاکستان دی نمائندگی کرݨ میڈے کیتے باعث اعزاز اے، چین کوں اساں ہمیشہ آپݨا “آئرن برادر” آکھیندے آیوں، آئرن برادرز اینڈ سسٹرز دی اصطلاح صرف لفظ نئیں بلکہ ہک گہری تاریخی، ثقافتی اَتے تہذیبی وابستگی دی علامت اے۔عطاء اللہ تارڑ آکھیا جو پاکستان اَتے چین صرف ہمسایہ ملک نئیں بلکہ اساݙی سرحداں، پہاڑ اَتے دریا وی ہک ݙوجھے نال جُڑے ہوئن جو صدیاں تے محیط ہک عظیم تہذیب کوں آپݨے نال گھِن تے وہندن۔ انہاں آکھیا جو پاکستان وادی سندھ دی عظیم تہذیب دا وارث اے اَتے ایں تہذیب دا آغاز چین توں تھیندے۔ قدیم شاہراہ ریشم اڄ چین-پاکستان اقتصادی راہداری (سی پیک) دی صورت اختیار کر ڳئی اے جو محض تجارتی منصوبہ نئیں بلکہ تہذیباں کوں جوڑن دا راہ اے۔عطاء اللہ تارڑ آکھیا جو پاکستان اَتے چین دی شراکت داری صرف حکومتی سطح تئیں محدود نئیں رہی، اساں چائنا میڈیا گروپ دے نال اشتراک نال کئی ایجھے پروگرامز دا آغاز کیتا جو اساݙے نوجواناں کوں روشن، باشعور اَتے بااختیار بݨا ݙیندے۔ انہاں “Hi China Hi Pakistan” پروگرام اَتے “Hua Shang Weekly” دی اشاعت دا ذکر کریندیں ہوئیں ݙوہیں اقوام وچال رابطے کوں بیا مضبوط قرار ݙتا۔ انہاں آکھیا جو Hi China, Hi Pakistan ہک ایجھا پروگرام اے جو دوستی، تفہیم اَتے باہمی احترام کوں فروغ ݙیندے، انگریزی اَتے چینی زبان اچ پاکستان توں شائع تھیوݨ آلا Hua Shang Weekly ݙوہیں اقوام کوں ہک ݙوجھے دے نیڑے گھن آندا پئے۔آپݨے خطاب دے چھیکڑ تے وفاقی وزیر اطلاعات آکھیا جو اساں ہک ایجھے پُرامن مستقبل دے خواہاں ہن جتھاں پاݨی کوں ہتھیار دی بجائے امن دا ذریعہ بݨایا ونڄے، اساں وادی سندھ دے لوک ہیسے، تہذیب دے وارث ہیسے۔ انہاں صدر شی جن پنگ دے وژن، فورم دے انعقاد تے سارے شرکا اَتے میزبان ملک دا شکریہ ادا کیتا۔