بھارتی حکومت مقبوضہ کشمیر اچ ماورائے عدالت قتل بند اَتے کشمیری عوام دے خلاف طاقت دے اندھے استعمال توں باز رہوے، ترجمان دفتر خارجہ

اسلام آباد۔ 11 جولائی(اے پی پی)ترجمان دفتر خارجہ شفقت علی خان آکھیے جو 13 جولائی کوں 94واں ’یوم شہدائے کشمیر‘ انہاں 22 کشمیراں دی شہادت دی یاد اچ منایا ویسی جنہاں 1931ء اچ سرینگر اچ ݙوگرا فورسز دی اندھا دھند فائرنگ دا مقابلہ کریندے ہوئیں اپݨیاں جاناں ݙتیان ہن۔ ترجمان دفتر خارجہ پریس بریفنگ اچ آکھیا جو اساں شہداء دی جرات اَتے بہادری کوں سلام پیش کریندے ہین جنہاں کشمیری عوام دے بنیادی حقوق اَتے آزادی کیتے ہک دلیرانہ جدوجہد کوں ودھائےم اے وݙی بدقسمتی دی ڳالھ اے جو سانحہ سرینگر دے 94 سال گزرݨ دے بعد وی کشمیریاں دی حالت زار نہ مکݨ آلی اے، بھارتی فورسز کوں سخت ایمرجنسی اَتے انسداد دہشت گردی دے قوانین دے تحت کہیں وی کشمیری کوں قتل کرݨ اَتے انہاں دیاں املاک کوں تباہ کرݨ دی کھلی چھوٹ ملی ہوئی اے۔ انہاں آکھیا جو ایں ہفتے دے شروع اچ کشمیری نوجوان رہنما برہان مظفر وانی دے ماورائے عدالت قتل دی ناویں برسی منائی ڳئی، برہان مظفر وانی انہاں سیکڑاں کشمیری نوجواناں اچوں ہک ہن جیڑھے ماورائے عدالت قتل تھئن۔ ترجمان ہک واری ول بھارتی حکومت تے زور ݙیتا جو او مقبوضہ کشمیر اچ ماورائے عدالت قتل بند اَتے کشمیری عوام دے خلاف طاقت دے اندھا دھند استعمال توں باز رہوے۔