موسمیاتی تبدیلیاں دے خلاف وختی اتے درست اقدامات دی لوڑھ اے، ڈاکٹر مصدق ملک

اسلام آباد۔31جولائی (اے پی پی) وفاقی وزیرموسمیاتی تبدیلی و ماحولیاتی ہم آہنگی ڈاکٹر مصدق ملک خبردار کیتے جو موسمیاتی تبدیلیاں دے خلاف جے وختی تے درست اقدامات نہ کیتے ڳئے تاں دنیا ہک ایہو جیھے نکتے تئیں پُڄ سڳدی اے جتھوں واپسی ممکن نہ ہووے، موسمیاتی تبدیلی دے خلاف جدوجہد دراصل انصاف دا معاملہ اے۔جاری بیان موجب وفاقی وزیر موسمیاتی تبدیلی و ماحولیاتی ہم آہنگی ڈاکٹر مصدق ملک ایتھوپین سفارتخانہ دی طرفوں اسلام آباد وچ منعقدہ شجرکاری مہم وچ بطور مہمانِ خصوصی شرکت کیتی۔ اے مہم “تجدید بذریعہ شجرکاری” دے عنوان دے تحت منعقد کیتی ڳئی جیں دی قیادت ایتھوپیا دے خصوصی ایلچی اتے سفیر جمال بیکر عبداللہ کیتی۔ ایں پروگرام دے تحت پاکستان وچ ٻوٹے رادھے ویسن جیڑھے جو ایتھوپیا دے 700 ملین وݨ رہاوݨ دے ہدف وچ تعاون کریسن جیں دا مقصد ماحولیاتی نظام دی بحالی اتے کاربن اخراج وچ کمی اے۔سفیر جمال بیکر عبداللہ اجلاس وچ ایتھوپیا دے معروف ’’گرین لیگیسی انیشی ایٹو‘‘دا ݙسایا جو ماحولیاتی توازن دی بحالی، کاربن دے اخراج وچ کمی اتے پائیدار ترقی دے ودھارے کیتے شروع کیتا ڳیا۔ انہاں ایں موقع تے آکھیا جو پاکستان موسمیاتی تبدیلی دے خلاف اپݨی جدوجہد وچ کلھا نہ ہوسی اتے انہاں وفاقی وزیر کوں ایتھوپیا وچ ایں سال ستمبر وچ منعقد تھیوݨ آلے افریقہ کلائمیٹ سمٹ وچ شرکت دی دعوت ݙتی۔ ڈاکٹر مصدق ملک خطاب کریندے ہوئیں آکھیا جو موسمیاتی تبدیلی دے خلاف جدوجہد دراصل انصاف دا معاملہ اے۔ انہاں واضح کیتا جو ماحولیاتی وڳاڑ نہ صرف قدرت بلکہ انسانیت دے نال وی ناانصافی اے۔ انہاں خبردار کیتا جے وختی اتے درست اقدامات نہ کیتے ڳئے تاں دنیا ہک ایہو جیھے نکتے تئیں پُڄ سڳدی اے جتھوں واپسی ممکن نہ ہووے۔وفاقی وزیر اعلان کیتا جو وزارتِ موسمیاتی تبدیلی و ماحولیاتی ہم آہنگی اگست وچ ہک وسیع البنیاد قومی شجرکاری مہم شروع کریسی جیں وچ عوام کوں مفت ٻوٹے ݙتے ویسن تاں جو وݙے پیمانے تے شمولیت اتے ماحولیاتی بحالی کوں ودھارا ݙتا ونڄ سڳے. انہاں ایتھوپیا دی سبز پالیسیاں تے مبنی کامیابی کوں ہک مثبت مثال قرار ݙتا اتے آکھیا جو پاکستان ایں تجربے توں قیمتی سبق حاصل کرسڳدے۔ ݙوہائیں فریقاں ماحول دے تحفظ، ماحولیاتی بحالی اتے وݙے پیمانے تے شجرکاری دے ودھارے کیتے اپݨے عزم دا اعادہ کیتا اتے ایں ڳالھ تے اتفاق کیتا جو مشترکہ عملی اقدامات ہی آوݨ آلی نسلاں کیتے پائیدار اتے محفوظ مستقبل دی ضمانت ہن