وزیراعظم محمد شہباز شریف دی ریموٹ سینسنگ سیٹلائٹ دی کامیاب لانچنگ تے قوم کوں مبارخ

اسلام آباد۔31جولائی (اے پی پی) وزیراعظم محمد شہباز شریف ریموٹ سینسنگ سیٹلائٹ دی کامیاب لانچنگ تے قوم کوں مبارخ ݙیندے آکھیے جو اے سیٹلائٹ پاکستان اتے چین وچال پراݨے تعاون دی اعلیٰ مثال اے، ݙوہائیں ملکاں دا اشتراک خلاء دی وسعتاں تئیں پُڄ چُکئے۔ ایکس تے آپݨے بیان اچ وزیراعظم شہباز شریف سپارکو اتے پوری ٹیم کوں پاکستان دے جدید ریموٹ سینسنگ سیٹلائٹ دی کامیاب لانچنگ تے دلوں مبارخ ݙیندے آکھیا جو اے کامیابی پاکستان اتے چین وچال تعاون دیاں نویں بُلندیاں کوں ظاہر کریندی اے جیڑھی جو سرحداں توں اڳوں خلاء تئیں کھنڈ چکی اے ، اے اساݙی سانجھی سوچ دا مظہر اے جو خلائی ٹیکنالوجی کوں انسانیت دی بھلائی کیتے استعمال کیتا ونڄے۔وزیراعظم آکھیا جو اے سیٹلائٹ سی پیک کیتے بے شمار فیدیں دا حامل ہوسی، ایندا استعمال زراعت، شہری منصوبہ بندی، آفات نال نبݨݨ، ٹرانسپورٹ نیٹ ورکس دی نقشہ سازی اتے مختلف ماحول وچ ڈیٹا اکٹھا کرݨ کیتے وی کیتا ونڄ سڳسی۔ وزیراعظم آکھیا جو اساں اپݨے چینی شراکت داراں دے بے مثال تعاون اتے پاکستان دے خلائی پروگرام کوں اڳوں ودھاوݨ وچ مدد تے دلوں شکر گزار ہیسے