پاکستان دی مؤثر اتے فعال خارجہ پالیسی پاروں امریکہ پاکستانی مصنوعات تے ٹیرف گھٹ کرتے 19 فیصد کرݙتا

اسلام آباد۔1اگست (اے پی پی) پاکستان دی مؤثر اتے فعال خارجہ پالیسی پاروں امریکہ نال تجارتی معاہدے دے بعد امریکی منڈیاں وچ پاکستانی مصنوعات تے ٹیرف وی مزید گھٹ تھی ڳئے اتے پاکستان کوں خطے وچ ݙوجھے ملکاں دے مقابلے وچ نمایاں رعایت مل ڳئی اے۔ پاکستانی مصنوعات تے ٹیرف گھٹ کرتے 19 فیصد کر ݙتا ڳئے۔ اے فیصلہ پاکستان دی مؤثر، فعال اتے حکمت خارجہ پالیسی دا نتیجہ اے، جیڑھا جو اڄوکے مہینے اچ اعلیٰ سطحی سفارتی رابطیں اتے اقتصادی مذاکرات دے ذریعے تکڑی تھیندی رہی اے۔امریکہ دی طرفوں جاری کیتی ڳئی فہرست موجب بھارت تے 25 فیصد، بنگلہ دیش، سری لنکا، ویتنام، تائیوان تے 20 فیصد، پاکستان تے صرف 19 فیصد ٹیرف لاتا ڳئے۔ اے رعایت ایں ڳالھ دا واضح ثبوت اے جو پاکستان جنوبی ایشیا دے وݙے ملکاں وچ ساریں توں زیادہ ترجیح یافتہ تجارتی پوزیشن حاصل کر چُکئے۔ اے پیشرفت انہاں اہم سفارتی اقدامات دا پھل اے جنہاں وچ چیف آف آرمی سٹاف فیلڈ مارشل جنرل سید عاصم منیر دی امریکی صدر ڈونلڈ ٹرمپ نال ملاقات، وزیراعظم شہباز شریف اتے امریکی وزیر خارجہ مارکو روبیو وچال موثر رابطے اتے نائب وزیراعظم اسحاق ڈار اتے وزیر خزانہ محمد اورنگزیب دیاں امریکی حکام نال کامیاب اعلیٰ سطحی ملاقاتاں شامل ہن۔وزارتِ خزانہ ایں فیصلے کوں پاکستان کیتے ہک تجارتی موقع قرار ݙتے، جیڑھا نہ صرف برآمدات وچ ودھارا کریسی بلکہ امریکی مارکیٹ وچ پاکستانی مصنوعات دی موجودگی کوں مزید وسعت ݙیسی۔ پاکستان کوں جنوبی ایشیا دے ترائے وݙے ملکاں وچ ساریں توں زیادہ رعایت حاصل تھئی اے۔ اے پیشرفت نہ صرف ݙو طرفہ تجارتی تعلقات وچ بہتری دی عکاس اے بلکہ پاکستان دی خارجہ و تجارتی پالیسی دی کامیابی وی اے۔ عالمی سطح تے ݙوجھے ملکاں تے لاتے ڳئے ٹیرف شرح جنوبی افریقا: 30 فیصد، سوئٹزرلینڈ: 39 فیصد، ترکیہ اتے اسرائیل: 15 فیصد، کینیڈا: 35 فیصد (پہلے 25 فیصد)، برطانیہ، برازیل، فاکلینڈ آئی لینڈز: 10 فیصد، میانمار، لائوس: 40 فیصد، شام: 41 فیصد (ساریں توں زیادہ) ہن۔ پاکستان وانگوں جنہاں ݙوجھے ملکاں تے 19 فیصد ٹیرف لاتا ڳئے انہاں وچ انڈونیشیا، ملائیشیا، فلپائن، تھائی لینڈ اتے کمبوڈیا شامل ہن۔تجزیہ کاراں دا آکھݨ اے جو امریکہ دی طرفوں بھارت دے مقابلے وچ پاکستان کوں گھٹ ٹیرف ݙیوݨ پاکستان دی مؤثر اتے فعال خارجہ پالیسی دی نشاندہی کریندے۔ اے فیصلہ انہاں متعدد اعلیٰ سطحی رابطیں دا نتیجہ اے۔ وزارتِ خزانہ ایں فیصلے دا خیرمقدم کریندی اے اتے سمجھدی اے جو اے اقدام پاکستانی برآمدات کوں نویں توانائی بخشیسی۔ خصوصاً ٹیکسٹائل، چمڑے، فارما، زرعی مصنوعات اتے انجینئرنگ چیزاں دے شعبیں وچ امریکہ وچ پاکستانی مصنوعات دی رسائی مزید ودھ سڳسی۔ اے فیصلہ امریکی حکام دی طرفوں ہک متوازن اتے مستقبل بین پالیسی دی عکاسی کریندے، جیڑھا پاکستان کوں جنوبی اتے جنوب مشرقی ایشیا دے ݙوجھے ملکاں دے مقابلے وچ مسابقتی حیثیت ݙیندے ۔ خاص طور تے، اے ٹیرف سطح پاکستان دی برآمدی استعداد کوں ودھارا ݙیوݨ وچ مددگار ثابت تھیسی، بالخصوص ٹیکسٹائل دے شعبے وچ جو ملکی برآمدات دی ریڑھ دی ہڈی سمجھیا ویندے۔وزارتِ خزانہ، متعلقہ سٹیک ہولڈرز دے نال نیڑے مشاورت دے بعد، ایں ڳالھ تے پُرعزم اے جو موجودہ ٹیرف معاہدہ امریکی منڈی وچ پاکستان دی موجودگی کوں وسعت ݙیوݨ دا ہک اہم موقع ݙیندے۔ ہݨ ویلھا آڳئے جو پاکستانی برآمد کنندگان اتے تجارتی تنظیماں ایں پیشرفت توں بھرپور فیدہ چاوݨ کیتے جارحانہ اتے ہدف رکھݨ آلی مارکیٹنگ حکمت عملی اپناون۔ ٹیکسٹائل دے علاوہ ݙوجھے شعبیں وچ وی نمایاں ترقی دی گنجائش موجود اے، اتے حکومت برآمدات کوں فروغ ݙیوݨ کیتے پالیسی معاونت، مارکیٹ انٹیلیجنس، اتے تجارتی ودھارے دیاں مختلف پہلواں نال سہولت ݙیوݨ کیتے پُرعزم اے۔ حکومتِ پاکستان کوں امید اے جو امریکہ دے نال سرمایہ کاری، مصنوعی ذہانت، کرپٹو کرنسی، معدنیات، توانائی، اتے ݙوجھے ابھردے شعبہ جات وچ وی مثبت رابطے اتے نیڑے تعاون جاری رہسی۔ پاکستان صدر ٹرمپ اتے امریکی انتظامیہ دے نال اقتصادی ترقی اتے سانجھی خوشحالی دے مشترکہ اہداف دے حصول کیتے نیڑے رابطے قائم رکھیسی۔ وزارتِ خزانہ، امریکی حکام دی تعمیری شراکت دی تعریف کریندی اے ۔ وزارت خزانہ برآمد کنندگان اتے تجارتی اداریں توں اپیل کریندی اے جو او ایں موقع توں بھرپور فیدہ چاون، اتے عالمی معیار دی مصنوعات اتے بھرپور مارکیٹنگ حکمتِ عملی دے ذریعے امریکی مارکیٹ وچ پاکستان دا حصہ مزید تکڑا کرن۔