وزیراعظم شہباز شریف دی صدارت اجلاس، گلگت بلتستان اچ سیلاب نال نقصانات تے امدادی کارروائیاں تیز کرݨ دی ہدایت

گلگت۔4اگست (اے پی پی) وزیراعظم محمد شہباز شریف گلگت بلتستان اچ سیلاب اتے بارشاں توں متاثرہ آبادیاں دی بحالی کیتے اقدامات تکھے کرݨ، مواصلاتی رابطے ترجیحی بنیاداں تے بحال کرݨ اتے این ڈی ایم اے کوں صوبائی حکومت دی ہر قسم دی مدد کرݨ دی ہدایت کریندیں ہوئیں آکھیا جو “مقامی آبادیاں کوں پاݨی دے قدرتی گزرگاہیں توں دور آباد کیتا ونڄے اتے ہنگامی صورتحال اچ جلدی ریسکیو تے مدد کیتے جامع نظام بݨایا ونڄے۔ سنوار کوں وزیراعظم آفس دے میڈیا ونگ توں جاری بیان موجب وزیراعظم محمد شہباز شریف دی صدارت گلگت بلتستان اچ اڄوکے مون سون تے سیلابی صورتحال دے نتیجے اچ نقصانات اتے امدادی کارروائیاں تے بحالی دے حوالے نال جائزہ اجلاس تھیا۔ اجلاس اچ وفاقی وزرا انجینئر امیر مقام، عبدالعلیم خان، عطاء اللہ تارڑ، میاں معین وٹو، ڈاکٹر مصدق ملک، مشیر وزیراعظم رانا ثنا اللہ، وزیراعظم دے کوآرڈینیٹر شبیر احمد عثمانی، گورنر گلگت بلتستان سید مہدی شاہ، وزیراعلیٰ گلگت بلتستان گلبر خان، چیئرمین این ڈی ایم اے انعام حیدر ملک اتے ݙوجھے اعلیٰ حکام اتے سرکاری عہدیداراں شرکت کیتی۔ وزیراعظم محمد شہباز شریف اجلاس توں خطاب کریندیں ہوئیں اڄوکے مون سون اچ گلگت بلتستان اتے ملک دے ݙوجھے علاقیاں اچ تھیوݨ آلے ݙکھ اتے افسوس کیتا۔ انہاں آکھیا جو “انہاں حادثیاں تے میݙے سمیت پوری قوم غمگین اے۔ انہاں آکھیا جو “پاکستان دا موسمیاتی تبدیلی اچ حصہ نہ تھیوݨ دے برابر اے جݙاں جو ایں دے مضر اثرات توں سب توں ودھ متاثر تھیوݨ آلے ملکاں دی فہرست اچ پاکستان شامل اے۔ وزیراعظم ہدایت کیتی جو “موسمیاتی تبدیلی کوں سامݨے رکھیندیں ہوئیں ویلھے سر پیش گوئی، امدادی کارروائیاں کیتے تیاری اتے خطرے توں ݙرن آلے علاقیاں اچ موسمیاتی مزاحمت آلا انفراسٹرکچر بݨایا ونڄے، سیرگاہیں کیتے موسم دے اعتبار نال پہلے توں آگاہی دا نظام بݨایا ونڄے، مقامی آبادیاں کوں پاݨی دے قدرتی گزرگاہیں توں پرے بحال کیتا ونڄے، مستقبل اچ ایں طرح دی کہیں وی ہنگامی صورتحال توں بچݨ کیتے محکمہ موسمیات دے پہلے توں اطلاع ݙیوݨ دے نظام کوں ٻیا فعال اتے مربوط بݨایا ونڄے۔ وزیراعظم این ڈی ایم اے اتے وزارت موسمیاتی تبدیلی کوں رَل تے گلگت بلتستان اچ اڳوں آوݨ آلے کجھ مہینیاں اچ پہلے توں اطلاع تے نگرانی کیتے مرکز بݨاوݨ دی وی ہدایت کیتی۔ انہاں آکھیا جو “ہنگامی صورتحال اچ جلدی ریسکیو تے مدد کیتے ہک جامع نظام بݨایا ونڄے جݙاں جو ریسکیو تے ریلیف اقدامات کوں ٻیا موثر بݨاوݨ کیتے این ڈی ایم اے صوبائی حکومتاں تے اداریاں نال تعاون یقینی بݨاوے۔ انہاں اڄوکے مون سون توں متاثرہ لوکاں دی بحالی کیتے اقدامات کوں جلدی مکمل کرݨ اتے شاہراہواں تے ݙوجھے انفراسٹرکچر دے نقصانات دا سروے کر تے سارے علاقیاں دے مواصلاتی رابطیاں کوں ترجیحی بنیاداں تے بحال کرݨ دی وی ہدایت کیتی۔ وزیراعظم این ڈی ایم اے، پی ڈی ایم اے، وزارت مواصلات، ضلعی انتظامیہ تے ریسکیو افسراں تے اہلکاراں دی امدادی کارروائیاں اتے اقدامات کوں سراہندے ہوئیں آکھیا جو “گلگت بلتستان سوھے ملک دے شمالی علاقیاں اچ سیر دے وسیع موقعے ہن، موسمیاتی تبدیلی بارے موسمیاتی مزاحمت آلے انفراسٹرکچر دی تعمیر اتے خراب موسمی صورتحال دی پہلے توں آگاہی نال سیاحاں تے مقامی لوکاں کوں ہنگامی صورتحال توں بچایا ونڄ سڳدے۔ وزیراعظم این ڈی ایم اے کوں صوبائی حکومت کوں ہر قسم دی مدد کرݨ دی ہدایت کیتی۔ اجلاس اچ وزیراعظم کوں اڄوکی بارشاں اتے ایں دے نتیجے اچ سیلاب دی صورتحال تے نقصانات دا ݙسیا ڳیا۔ اجلاس اچ صوبائی انتظامیہ اتے چیئرمین این ڈی ایم اے ملک بھر خاص طور تے گلگت بلتستان اچ شدید مون سون نال تھیوݨ آلے ہݨ تئیں دے نقصانات، ممکنہ موسمی صورتحال اتے ہݨ تئیں کیتے ڳئے اقدامات تے بریفنگ ݙتی۔ اجلاس کوں وزارت موسمیاتی تبدیلی ولوں گلیشیئل لیک آؤٹ برسٹ فلڈ (GLOF) دے پہلے توں اطلاع ݙیوݨ دے نظام دی تنصیب تے پیش رفت دا وی ݙسیا ڳیا۔ اجلاس کوں ݙسیا ڳیا جو گلگت بلتستان اچ 21 جولائی 2025 کوں تھک-بابوسر، تھور، کنڈداس اتے اشکومن تے کلاؤڈ برسٹ دی وجہ نال شدید بارش تھئی جئیں دے نتیجے اچ سیاح اتے مقامی آبادی کوں نقصان تھیا، 600 توں ودھ لوکاں کوں ریسکیو کیتا ڳیا اتے تباہ تھیوݨ آلی شاہراہواں کوں رابطیاں دی بحالی کیتے مرمت کر تے ہک واری ول کھولیا ڳیا۔ اجلاس کوں ݙسیا ڳیا جو ریسکیو آپریشن کیتے 5 خیمہ وستیاں ٻݨائی ڳئی جݙاں جو 10 ہیلی کاپٹر اتے 2 سی-130 جہازاں کوں سیاحاں تے ݙوجھے پھسے ہوئے لوکاں کوں محفوظ مقاماں تے پُچاݨ کیتے استعمال کیتا ڳیا۔ اجلاس کوں ݙسیا ڳیا جو ایں آپریشن اچ پاک فوج، این ڈی ایم اے، ضلعی انتظامیہ، پولیس، جی بی ڈی ایم اے، 1122 اتے ہیلتھ ورکرز حصہ گھدا۔ اجلاس کوں وزارت مواصلات ولوں بارشاں تے سیلاب توں متاثرہ شاہراہواں، پلاں تے انفراسٹرکچر بارے وی ݙسیا ڳیا۔ وزیراعظم متاثرہ انفراسٹرکچر کوں موسمیاتی مزاحمت کوں سامݨے رکھیندیں ہوئیں ہک واری ول بݨاوݨ دی ہدایت کیتی۔ اجلاس کوں وزارت موسمیاتی تبدیلی ولوں “گلوف” (گلیشیئل لیک آؤٹ برسٹ فلڈ) دے پہلے توں اطلاع ݙیوݨ دے نظام دی جاری تنصیب تے پیش رفت دا وی ݙسیا۔ وزیراعظم این ڈی ایم اے کوں وزارت دے نال تعاون نال ایں نظام دی اڳوں آوݨ آلے ݙو مہینیاں اچ مکمل تنصیب دی ہدایت کیتی۔ وزیراعظم نظام دی تنصیب دی تھرڈ پارٹی ویلیڈیشن کرواوݨ اتے وزیر آبی وسائل کوں گلگت بلتستان اچ پاݨی دے بہتر نظام دے حوالے نال مشاورت تے منصوبہ بندی مکمل کرݨ دی وی ہدایت کیتی۔