چھی ستمبر شجاعت اتے بہادری دا تاریخی ݙینھ جݙاں شہداء، غازیاں اتے قوم رل تے پاکستان کوں ناقابلِ تسخیر بݨایا، محسن نقوی

اسلام آباد-6 ستمبر (اے پی پی) وفاقی وزیر داخلہ محسن نقوی آکھیے جو 6 ستمبر شجاعت اتے بہادری دا تاریخی ݙینھ جݙاں شہداء، غازیاں اتے قوم رل تے پاکستان کوں ناقابلِ تسخیر بݨایا۔ یوم دفاع و شہداء تے وزیر داخلہ محسن نقوی آپݨے پیغام وچ آکھیا جو شہداء دیاں نہ بھلݨ آلی قربانیاں کوں شاندار الفاظ وچ خراج عقیدت پیش کرینداں۔ دفاعِ وطن کیتے جاناں قربان کرݨ آلے شہداء ساݙی عزت، شان اتے ساکھ ہن۔ یوم دفاع و شہداء عزم، حوصلے اتے قربانی دی زندہ میراث ہن۔ مکار دشمن دی سازش دے بت مسلح افواج اتے قوم دے ایمان، جذبے اتے ہمت دے سامݨے پاش پاش تھی ڳئے۔ او دشمن جیڑھا جمخانہ وچ چاہ دے خواب ݙیکھدا ہئی، بدترین شکست کھا تے خالی ہتھ بھڄ ڳئے۔ قصور توں لاہور، سیالکوٹ توں کشمیر تئیں پاک فوج بے مثال جرات اتے نہ بدلݨ آلے عزم نال دشمن کوں ہر محاذ تے منہ بھن جواب ݙتا اتے مادرِ وطن کوں اپݨے لہو نال سڄایا۔ معرکہ حق تاریخ وچ سنہری حرفاں نال لکھیا ڳئے جݙاں جواناں اپݨے نال نال بارود ٻدھ تے دشمن دے ٹینک تباہ کرݙتے۔ بہادر سپوتاں دی قربانی دشمن دے ٹینک کوں قبرستان وچ بدل ݙتا اتے جرات دی وݙی مثال رقم کیتی جیڑھی ہمیشہ یاد رکھی ویسی۔ سلام انہاں بہادر لوکاں تے جنہاں جاناں قربان کرتے سرحداں کوں ناقابلِ عبور بݨا ݙتا اتے دشمن کوں پچھوں بھڄݨ تے مجبور کیتا۔ اے او سپوت ہن جنہاں اپݨی سینہ سپری نال آوݨ آلی نسلاں کوں آزادی، امن اتے وقار دی نعمت ݙتی۔ شہداء اتے غازیاں دے ورثے توں ملݨ آلی طاقت، جذبہ اتے شجاعت ساݙی اصل قوت اے۔ یوم دفاع و شہداء دی وݙی کامیابی دا تسلسل آپریشن بنیان مرصوص دی تاریخی فتح وچ ملدے۔ 6 ستمبر اے وعدے دی تجدید اے جو وطن دی حرمت تے کݙاہیں وی آنچ نہ آوݨ ݙیسی اتے قربانی دا چراغ ہمیشہ ٻلدا رہسی۔