وزیراعظم شہباز شریف دا سٹاک ایکسچینج ہنڈرڈ انڈیکس 1 لکھ 56 ہزار پوائنٹس دی سطح پار کرݨ تے اطمینان

اسلام آباد-8 ستمبر (اے پی پی) وزیر اعظم محمد شہباز شریف سٹاک ایکسچینج ہنڈرڈ انڈیکس 1 لکھ 56 ہزار پوائنٹس دی سطح پار کرݨ تے اطمینان کریندیں ہوئیں آکھیا جو پاکستان سٹاک ایکسچینج دا تاریخی سطح پار کرݨ، کاروباری برادری تے سرمایہ کاراں دے حکومت دی پالیسیاں تے اعتماد کوں نشابر کریندے۔ سنوار کوں وزیراعظم آفس دے میڈیا ونگ توں جاری بیان موجب وزیراعظم آکھیا جو اللہ دے فضل و کرم نال ملکی ترقی دا پندھ معاشی ٹیم دی محنت پاروں جاری و ساری اے۔ حال اچ چین دے نجی شعبے دے نال پاکستان دی نجی کمپنیاں دے ارباں ڈالر دے معاہدے تے مفاہمتی یادداشتیں تے دستخط تھین۔ وزیر اعظم آکھیا جو ملک اچ سرمایہ کاری اچ ودھارے نال صنعتاں لڳسن، برآمدات اچ ودھارا تھیسی اتے روزگار دے ٻئے مواقع پیدا ہوسن۔ انہاں آکھیا جو ملکی معاشی سمت دی بہتری اتے ترقی دے پندھ تے ڳامزن کرݨ کیتے معاشی ٹیم دی کوششاں قابل ستائش ہن۔