پی ڈی ایم اے دی دریائے راوی، ستلج اتے چناب اچ تکھے سیلابی صورتحال پاروں نقصان دی تفصیلی رپورٹ جاری

لاہور-8 ستمبر (اے پی پی) پنجاب ڈیزاسٹر مینجمنٹ اتھارٹی (پی ڈی ایم اے) دریائے راوی، ستلج اتے چناب وچ تکھے سیلابی صورتحال پاروں نقصان دی تفصیلی رپورٹ جاری کر ݙتی۔ ریلیف کمشنر پنجاب نبیل جاوید دے مطابق صوبے دے 43 سو توں ودھ موضع جات براہِ راست متاثر تھئن جڈاںجو مجموعی طور تے 41 لکھ 99 ہزار لوک سیلاب توں متاثر تھین۔ سیلاب اچ پھتے 21 لکھ 47 ہزار شہراں کوں محفوظ جہیں تے منتقل کیتا ڳئے۔ متاثرہ ضلعیاں اچ 412 ریلیف کیمپس، 492 میڈیکل کیمپس اتے مویشیاں دے علاج تے معالجے کیتے 432 ویٹرنری کیمپس ٻݨا ݙتے ڳئن۔ ریسکیو اتے ریلیف سرگرمیاں دے دوران 15 لکھ 49 ہزار توں ودھ جانوراں کوں وی محفوظ جہیں تے منتقل کیتا ڳئے۔ ریلیف کمشنر آکھیا جو منگلا ڈیم 88 فیصد، تربیلا ڈیم 100 فیصد، دریائے ستلج تے بھارتی بھاکڑا ڈیم 90 فیصد، پونگ ڈیم 99 فیصد اتے تھین ڈیم 97 فیصد تئیں بھر ڳئن۔ رپورٹ دے مطابق اڄوکے سیلاب دے نتیجے اچ 60 شہری جاں بحق تھیئن۔ ریلیف کمشنر پنجاب نبیل جاوید آکھیا جو وزیراعلیٰ پنجاب دی ہدایت موجب متاثرہ شہراں دے نقصان دا ازالہ کیتا ویسے اتے بحالی دے اقدامات پورے طور تے جاری رہسن۔