وزیراعظم شہباز شریف دی انکم ٹیکس اتے سیلز ٹیکس ݙیوݨ آلیاں دی ڈائریکٹری جلد مکمل کرݨ، ٹیکس چوراں دی شناخت کیتے نجی شعبے دی خدمتاں وی حاصل کرݨ دی ہدایت

اسلام آباد۔9ستمبر (اے پی پی) وزیراعظم محمد شہباز شریف انکم ٹیکس اتے سیلز ٹیکس ݙیوݨ آلیاں دی ڈائریکٹری جلد مکمل کرݨ، ٹیکس چوراں دی شناخت کیتے نجی شعبے دی خدمتاں وی حاصل کرݨ دی ہدایت کیتی اے۔  انہاں اے ڳالھ منگل کوں ایف بی آر اچ جاری اصلاحات بارے جائزہ اجلاس دی صدارت کریندیں ہوئیں آکھی۔ وزیراعظم آفس دے میڈیا ونگ ولوں جاری بیان موجب اجلاس اچ وفاقی وزیر قانون تے انصاف اعظم نذیر تارڑ، وفاقی وزیر اقتصادی امور احد خان چیمہ، وفاقی وزیر اطلاعات و نشریات عطاء اللہ تارڑ، وفاقی وزیر ماحولیاتی تبدیلی ڈاکٹر مصدق مسعود ملک، وزیر خزانہ محمد اورنگزیب، وزیر پٹرولیم علی پرویز ملک اتے متعلقہ اداریاں دے اعلیٰ افسراں شرکت کیتی۔ وزیراعظم ٹیکس ݙیوݨ آلیاں دی پذیرائی کیتے انکم ٹیکس اتے سیلز ٹیکس ݙیوݨ آلیاں دی ڈائریکٹری کوں جلد از جلد مکمل کراوݨ دی ہدایت کریندیں ہوئیں آکھیے جو باقاعدگی نال ٹیکس ݙیوݨ آلے ذمے دار شہری ملک دی معیشت دی ریڑھ دی ہڈی دا کردار ادا کریندے پئن۔ انہاں آکھیا جو ٹیکس ݙیوݨ آلیاں دی پذیرائی اتے ٹیکس چوری کرݨ آلے لوکاں دی سرزنش ٹیکس نیٹ کوں ودھاوݨ کیتے مددگار تھیسی۔ وزیراعظم ایف بی آر کوں ٹیکس ݙیوݨ آلیاں کیتے کاروبار دوست ماحول اتے ہتھ آلی سہولت ݙیوݨ اتے ٹیکس چوری کرݨ آلے لوکاں دی شناخت اتے انہاں توں محصولات دی وصولی کیتے پروفیشنلز دی خدمتاں حاصل کرݨ دی ہدایت کیتی۔ انہاں آکھیا جو ٹیکس چوری کرݨ آلے لوکاں اتے کمپنیاں دی شناخت کیتے نہ صرف ایف بی آر اچ موجود لوک بلکہ نجی شعبے دی خدمتاں وی حاصل کیتیاں ویسن۔ وزیراعظم حکومت دے ٹیکس چوری دے خلاف اقدامات دے حوالے نال عوام کیتے آگاہی مہم چلواوݨ دی وی ہدایت کیتی۔ انہاں آکھیا جو کسٹم کلیئرنس اچ مس ڈیکلیریشن اتے انڈر انوائسنگ دے تھرڈ پارٹی جائزے کیتے بہترین ٻاہرلے آڈیٹرز دا انتخاب کیتا ویسے، تھرڈ پارٹی جائزے کوں جاری رکھیا ویسے تاں جو سسٹم اچ موجود خامیاں دی نشاندہی تھی سگے اتے ٻیا بہتر بݨایا ویسی۔ اجلاس اچ وزیراعظم کوں ٹیکس چوراں دی شناخت کیتے اقدامات، ٹیکس ݙین آلیان دی ڈائریکٹری اتے محصولات اچ ودھارے کیتے سپر آڈیٹرز دے ذریعے کیتے ڳئے اقدامات تے بریفنگ ݙتی ڳئی۔ وزیراعظم کوں ݙسایا ڳیا جو انکم اتے سیلز ٹیکس ݙیوݨ آلیاں دی پذیرائی کیتے ٹیکس ݙیوݨ آلیاں دی ڈائریکٹری دی تکمیل تے کم تیزی نال جاری اے۔ کسٹم کلیئرنس اچ مس ڈیکلیریشن اتے انڈر انوائسنگ دے تھرڈ پارٹی جائزہ کیتے ہک سائنٹفک آڈٹنگ نظام ترتیب ݙتا ڳیا ایں دے تحت سپر آڈیٹرز دا تعین کیتا ڳیا جنھاں کسٹم کلیئرنس اتے رسک مینجمنٹ سسٹم دا تفصیلی جائزہ ڳھدا ڳئیا۔ ایں جائزے توں مرتب تھیوݨ آلے نتائج کوں رسک مینجمنٹ سسٹم اچ بہتری کیتے استعمال کیتا ویسی۔