عمرہ ایکٹ منظور تھی ڳئے، ہݨ کہیں کوں خریت منڳݨ آلیں کوں عمرہ کراوݨ دا موقع نہ ملسی، وفاقی وزیر مذہبی امور سردار محمد یوسف

اسلام آباد۔11ستمبر (اے پی پی) وفاقی وزیر مذہبی امور سردار محمد یوسف آکھیے جو عمرہ ایکٹ منظور تھی ڳئے، کجھ عمرہ کرݨ آلے زائرین سعودی عرب اچ منڳݨ شروع کرݙیندن جیں توں ملک دی بدنامی تھیندی ہئی، ہݨ کہیں کوں گداگراں کوں عمرہ کراوݨ دا موقع نہ ملسی۔ اتھاں حج و عمرہ ایگزیبیشن 2025 دی پری لانچ تقریب توں خطاب کریندے انہاں آکھیا جو فریضہ حج ادا کرݨ دے دوران عبادت دے نال نال حاجی اُتے لازم اے جو او سعودی قوانین دا وی خیال رکھن، کیوں جو حاجی آپݨے ملک دے سفیر ہوندن، انہاں کیتے ملکی عزت و وقار دا خیال رکھݨ ٻہوں اہمیت رکھیندے۔ انہاں آکھیا جو حج مالی اتے بدنی عبادت دا ناں اے، بطور وزیر مذہبی امور حج دے معاملیں دے حوالے نال میکوں علماء کرام اتے ٻئے لوکاں دی صلاح مشورہ ملدا رہیے 2013 توں 2018 تئیں میݙے دور وزارت اچ حج دے انتظامات اچ بہتری نظر آئی کیوں جو اساں حج دیاں ٻیاں ساریاں کیٹگریز ختم کرتے صرف ہک کیٹگری رکھی ہئی اتے حج دے حوالے نال جیڑھیاں شکایتاں ہن ساݙے ایں قدم توں انہاں دا وی ٻہوں حد تئیں ازالہ تھیا۔ سردار محمد یوسف آکھیا جو حج دا سفر کوئی تفریحی یا کاروباری سفر کائنی، اے اللہ اتے ایں دے رسول ﷺ دے حکم موجب عبادت دا سفر اے۔ وزیر مذہبی امور آکھیا جو پورے ملک دے معاشی نظام کوں اسلامی معاشی نظام بݨاوݨ تاں اوکھا کم اے تاں جو حج دے معاملیں دی حد تئیں اساں مالی معاملیں اچ اسلامی قوانین اُتے عملدرآمد کر سڳدوں، ایں سلسلے اچ آپݨے سابقہ دور اچ مولانا تقی عثمانی نال مشورہ کیتا جیں دے بعد اساں میزان بینک اچ شریعہ اکائونٹ کھول تے حاجیاں دیاں رقماں رکھݨ دا فیصلہ کیتا، میکوں اے ݙسایا ڳئے جو حاجیاں دیاں جمع رقماں اُتے شریعہ اکائونٹ اچ سود دا عمل دخل کائنی۔ انہاں آکھیا جو 2013 توں 2018 تئیں میݙی وزارت دے دور اچ اساں پنج حج کرائے۔ سردار یوسف دا آکھݨ ہئی جو پرائیویٹ اتے سرکاری سکیم دیاں سارے حاجیاں دی ذمے واری وزارت مذہبی امور دی اے، اساں سعودی تعلیمات دے موجب پالیسی بݨاوݨی ہوندی اے۔ وزیر مذہبی امور آکھیا جو ایں سال آندے حج (2026ء) کیتے وفاقی کابینہ توں وختی حج پالیسی منظور تھئی، وزیر اعظم دی ہدایت اُتے پرائیویٹ سکیم دا کوٹہ 30 فیصد اتے سرکاری سکیم دا حج کوٹہ 70 فیصد رکھݨ دا فیصلہ کیتا ڳیا، مقررہ ویلھے دے اندر سرکاری اتے پرائیویٹ سکیم دے تحت حج درخواستاں گھنݨ دا عمل پورا کر ڳھدے، وختی اقدامات پاروں ایں واری پاکستان دے ہک لکھ 79 ہزار حج کوٹہ اُتے عملدرآمد تھیسی۔ انہاں آکھیا جو عمرہ ایکٹ وی منظور تھی ڳئے، ایں اُتے وی عملدرآمد یقینی بݨایا ویسی، عمرہ اُتے ونجݨ آلے کجھ زائرین سعودی عرب اچ منڳݨ شروع کرݙیندن جیں توں ملک دی بدنامی تھیندی ہئی، ہݨ کہیں کوں گداگراں کوں عمرے اُتے بھیجݨ دا موقع نہ ملسی۔ انہاں آکھیا جو چین وانڳوں پاکستان کوں وی حج و عمرہ دے موقع اُتے سعودی عرب کیتے برآمدات اچ ودھارے اُتے توجہ ݙیوݨی ہوسی، حج اتے عمرہ ایگزیبیشن دے ذریعے ماسٹر ٹرینرز دی تربیت اتے ملکی معیشت کوں چنڳا بݨاوݨ کیتے حج و عمرہ دے موقع اُتے سعودی عرب کیتے برآمدات اچ ودھارے کیتے پیشرفت دے چنڳے نتیجے نکلسن۔ انہاں دا آکھݨ ہئی جو حج 2026 کم توں گھٹ پیکج دے نال کراوݨ ساݙی اولین کوشش ہوسی، وزارت مذہبی امور حج و عمرہ ایگزیبیشن دا انتظام کرݨ آلی کمپنی ”مع اسلامہ” دے نال ہر ممکن تعاون کریسی۔ وزیر مذہبی امور آکھیا جو ساݙی نوجوان نسل کوں چاہیدے جو او سوشل میڈیا دا ذمے واری نال استعمال یقینی بݨاون، ایں سال سیرت کانفرنس دا موضوع وی ایہا ہئی، ساݙے حاجیاں کوں وی چاہیدے جو حج دے ݙینھاں دے دوران ودھ توں ودھ شرعی حکماں دے تحت عبادات دا خیال رکھن اتے غیر ضروری معاملیں اچ نہ الجھن۔