صدر مملکت آصف علی زرداری دا چین دے شہر چینگڈو توں میانیانگ تئیں ہائی سپیڈ ریل ڳاݙی دے ذریعے سفر

میانیانگ۔14ستمبر(اے پی پی) صدر مملکت آصف علی زرداری چین دے شہر چینگڈو توں میانیانگ تئیں ہائی سپیڈ ریل گاݙی دے ذریعے سفر کیتا، جیڑھا تقریباً ادھے گھنٹے اچ پورا تھیا۔ سفر دے دوران صدر مملکت کوں ریل گاݙی دے نظام، سروسز، حفاظتی اقدامات اتے ماحولیاتی فیدے بارے بریفنگ ݙتی ڳئی۔ ایوان صدر دے میڈیا ونگ توں جاری بیان موجب حکام ݙسایا جو چین کنے دنیا دا ساریں توں وݙا ہائی سپیڈ ریلوے نیٹ ورک اے جیڑھا 45 ہزار کلومیٹر توں ودھ پٹریاں تے مشتمل اے اتے سالانہ ݙو ارب توں ودھ مسافراں کوں سہولت ݙیندے۔ اے ریل گاݙیاں 350 کلومیٹر فی گھنٹہ دی رفتار نال چلدن اتے تقریباً سارے وݙے چینی شہراں کوں آپت اچ جوڑیندی اے ۔ چین ہک معیاری اتے جدید مسافر نظام تیار کیتے جیڑھا اڄ دنیا کیتے جدید رابطیں دی ہک مثال بݨ چکئے۔ صدر آصف علی زرداری چین دی پائیدار اتے مضبوط ٹرانسپورٹ اچ کامیابیاں دی تعریف کریندے آکھیا جو ماحولیاتی آلودگی توں پاک بجلی دا نظام اتے زلزلے دی ویلھے توں پہلے اطلاع ݙیوݨ دی ٹیکنالوجی ریلوے انجینئرنگ دا شاہکار اے۔ انہاں آکھیا جو اے جدید اقدامات ٻئے ملکاں خاص طور تے پاکستان کیتے قیمتی رہنمائی ݙیندن۔ صدر دے نال پاکستان دے سفیر چین خلیل ہاشمی، پاکستان اچ چین دے سفیر جیانگ زائی ڈونگ، جیڑھے صدر دے نال پورے دورے اچ شریک ہن اتے سینیٹر سلیم مانڈوی والا وی موجود ہن۔ میانیانگ پجݨ تے صدر دا استقبال نائب میئر وو ہاؤ کیتا۔