جمہوریت عوام دی طاقت اتے ملک دے روشن مستقبل دی ضمانت اے،سپیکر قومی اسمبلی سردار ایاز صادق

اسلام آباد۔14ستمبر (اے پی پی) سپیکر قومی اسمبلی سردار ایاز صادق عالمی یوم جمہوریت دے موقع تے پاکستان دے جمہوری عزم، پارلیمانی استحکام اتے عوامی شمولیت دے تسلسل دی تعریف کریندے ہوئیں آکھیا جو جمہوریت عوام دی طاقت، اجتماعی دانش، اتے قومی ترقی و خوشحالی دی ضامن اے۔ انہاں آکھیا جو اڄ دا ݙینھ انہاں سارے سیاسی کارکناں، اڳواݨاں اتے صحافیاں دیاں قربانیاں یاد ݙویندے جنہاں جمہوریت دی بحالی اتے بقاء کیتے جدوجہد کیتی۔ قومی اسمبلی سیکرٹریٹ توں جاری بیان اچ اسپیکر قومی اسمبلی آکھیا جو پاکستان جمہوری جدوجہد دے نتیجے اچ بݨیے، اتے آئین پاکستان ہر شہری کوں برابری، مذہبی آزادی، ڳالھ کرݨ دے حق اتے شراکتی سیاست دے بنیادی حقوق ݙیندے۔ انہاں آکھیا جو اسلام وی مشاورت، آپسی رائے اتے عوامی شمولیت دی تعلیم ݙیندے، اتے ایہو ای اصولاں دی روشنی اچ جمہوری نظام عوامی نمائندگی تے قائم اے۔ سردار ایاز صادق آکھیا جو پارلیمان عوامی امیداں دا سپریم فورم اے، جتھاں قانون سازی، پالیسی سازی، اتے حکومتی نگرانی دے ذریعے عوامی رائے کوں عملی شکل ݙتی ویندی اے۔ انہاں آکھیا جو پارلیمان دی بالادستی، آئین دی پوری پاسداری، ادارہ جاتی ہم آہنگی اتے عوامی فلاح و بہبود جمہوری استحکام دی ضمانت اے۔ انہاں قائداعظم محمد علی جناحؒ دے 11 اگست دے تاریخی خطاب دا حوالہ ݙیندے آکھیا جو ہر شہری کوں مذہبی آزادی حاصل اے اتے ریاست دا تعلق بندے دے مذہب، ذات یا عقیدے نال نی ہوندا۔ سپیکر قومی اسمبلی سابق وزیراعظم میاں محمد نواز شریف، سابق خاتون اول بیگم کلثوم نواز، سابق وزرائے اعظم شہید ذوالفقار علی بھٹو اتے محترمہ بے نظیر بھٹو شہید سودھے ٻئے سیاسی رہنماواں دی ملک اچ جمہوریت دی بحالی اتے استحکام کیتے قربانیاں اتے جدوجہد کوں خراج عقیدت پیش کیتا۔ سپیکر سردار ایاز صادق آکھیا جو جمہوری نظام حکومت عوام کوں بااختیار بݨیندے، اداریں کوں جوابدہ کریندے اتے قومی ترقی کیتے اجتماعی بصیرت ݙیندے۔ انہاں آکھیا جو اڄ دا ݙینھ ایں عزم دی تجدید دا موقع اے جو اساں آئین، قانون، اتے اداریں دے استحکام کیتے آپݨی جدوجہد جاری رکھیسوں۔ انہاں ساریاں سیاسی جماعتاں تے زور ݙتا جو او آپت دے اختلافاں کوں پرے رکھیندے قومی مفاد اچ مشترکہ حکمت عملی اپناون۔ انہاں نویاں نسلاں دی جمہوری عمل اچ شرکت تے زور ݙیندے ہوئیں آکھیا جو قومی اسمبلی ولوں شروع کیتے گئے پارلیمانی اسٹڈیز پروگرام، انٹرن شپ پروگرامز، اتے یوتھ پارلیمنٹرینز فورم جھیں اقدامات دا مقصد نویں نسل کوں جمہوری عمل اچ شامل کرݨ اتے قومی ترقی اچ انہاں دا کردار یقینی بݨاوݨ اے۔ انہاں آکھیا جو نویں نسل دی شمولیت جمہوریت کوں نتیجہ خیز اتے پائیدار بݨاوݨ اچ بنیادی کردار ادا کریسی۔ سپیکر قومی اسمبلی مزید آکھیا جو پاکستان دی پارلیمان نہ صرف تریمتاں دے حقوق، مالیاتی شفافیت اتے ماحولیاتی تحفظ جیھے اہم معاملیں تے قانون سازی کیتی بلکہ وومنز پارلیمانی کاکس، پارلیمانی ٹاسک فورس برائے پائیدار ترقی دے اہداف (ایس ڈی جیز)، پارلیمانی کاکس برائے چائلڈ رائٹس، اتے ینگ پارلیمنٹرینز فورم جیھے پارلیمانی پلیٹ فارمز دے ذریعے آپت اچ جماعتاں دے تعاون کوں ودھایا۔ انہاں آکھیا جو اے فورمز پارلیمان اچ ساریاں سیاسی جماعتاں دی شراکت کوں ممکن بݨیندن، جیڑھے شراکتی جمہوریت اتے گڈ گورننس دی اصل روح اے۔