حکومت ٹیکس، توانائی، سرکاری اداریں وچ بہتری، پبلک فنانس تے ادارہ جاتی ڈھانچے وچ اصلاحات دے حوالے نال اقدامات کریندی پئی اے، وزیر خزانہ محمد اورنگزیب

اسلام آباد۔ 18 ستمبر (اے پی پی) وفاقی وزیر خزانہ و محصولات سینیٹر محمد اورنگزیب آکھیے جو حکومت ٹیکس، توانائی، سرکاری اداریں وچ بہتری، پبلک فنانس تے ادارہ جاتی ڈھانچے وچ اصلاحات دے حوالے نال اقدامات کریندی پئی اے، نجکاری دے عمل وچ تیزی گھن آئی ویندی پئی اے، یورپی کمپنیاں پاکستان وچ تیل وگیس، معدنیات، آئی ٹی، زراعت، توانائی، مالیات تے ہوابازی دے شعبیں وچ نجکاری دے موقع توں فیدہ چاون۔ انہاں اے ڳالھ پاکستان وچ یورپی یونین دے نویں تعینات تھیوݨ آلے سفیر ریمونڈاس کاروبلس نال ملاقات وچ ڳالھ مُہاڑ کریندے آکھی۔ ملاقات وچ سانجھی دلچسپی دے معاملات خصوصاً پاکستان تے یورپی یونین وچال اقتصادی تعاون ودھاوݨ تے تجارت و سرمایہ کاری دے تعلقات کوں مزید مستحکم بݨاوݨ تے زور ݙتا ڳیا۔ وزیر خزانہ سفیر کوں خوش آمدید اکھیندے انہاں کوں ملک دی موجودہ معاشی صورت حال تے بریفنگ ݙتی تے ݙسیا جو ملکی معیشت بحالی دے رستے تے اے تے پہلے توں زیادہ مستحکم پوزیشن تے اے۔ انہاں ݙسایا جو حکومت ٹیکس، توانائی، سرکاری اداریں وچ بہتری، پبلک فنانس تے ادارہ جاتی ڈھانچے وچ وݙے پیمانے تے اصلاحات کیتے اقدامات کریندی پئی اے، جݙاں جو آندے ݙینھاں وچ نجکاری دا عمل مزید تکھا تھیسی، وزیراعظم ذاتی طور تے معاشی اصلاحاتی ایجنڈے دی قیادت کریندے پئن۔ سینیٹر اورنگزیب ݙسیا جو ہݨے عالمی کریڈٹ ریٹنگ ایجنسیاں پاکستان دے معاشی منظرنامے تے مثبت رپورٹاں جاری کیتن جیندے نال عالمی شراکت داراں سودھے یورپی یونین دا اعتماد ودھیے۔ انہاں آکھیے جو کاروباری اعتماد وچ بہتری آئی اے تے مقامی سرمایہ کاراں کوں مزید سہولتاں ݙیوݨ دیاں کوششاں جاری ہن۔ وزیر خزانہ اڄوکی چھل توں فصلاں، مال ڈھور تے بنیادی ڈھانچے کوں پُڄݨ آلے ضیان تے وی روشنی پاتی۔ انہاں ݙسیا جو ہݨ تئیں 950 توں ودھ قیمتی جاناں ضائع تھی چُکن جݙاں جو سڑکاں، پُلاں تے فصلاں دے نقصانات دا تخمینہ این ڈی ایم اے تے مواصلاتی سیاریں توں حاصل تصویراں دے ذریعے لاتا ویندا پئے ۔ انہاں دا آکھݨ ہئی جو وفاقی کابینہ وقتی بین الاقوامی برادری توں بحالی تے تعمیر نو وچ تعاون دی اپیل کرݨ دے حوالے نال فیصلہ کریسی۔ وزیر خزانہ یورپی یونین پاکستان بزنس فورم دے ٻیا فعال کرݨ دے منصوبے دا خیرمقدم کیتا تے آکھیا جو یورپی کمپنیاں پاکستان وچ تیل و گیس، معدنیات، آئی ٹی، زراعت، توانائی، مالیات تے ہوابازی دے شعبیں وچ نجکاری دے موقع توں فیدہ چاون ۔ انہاں جی ایس پی پلس اسکیم دے تحت یورپی یونین دے مسلسل تعاون تے شکریہ وی ادا کیتا۔ یورپی سفیر پاکستان وچ اپݨی تعیناتی تے خوشی دا اظہار کیتا تے آکھیا جو پاکستان جنوبی ایشیا وچ امن تے استحکام دے ودھارے کیتے ٻہوں اہم ملک اے۔ انہاں پاکستان دی ڳزریل ݙڈھ سال دی معاشی کارکردگی تے عالمی کریڈٹ ریٹنگ وچ بہتری تے وزیر خزانہ کوں مبارخ ݙتی تے یورپی یونین دی طرفوں مستقل تعاون دا یقین ݙیوائے۔ انہاں ݙسیا جو ایں ویلھے 300 توں ودھ یورپی کمپنیاں پاکستان وچ مختلف شعبیں وچ کم کریندیاں پئن تے سانجھی تجارت و سرمایہ کاری دے تعلقات کوں مزید وسعت ݙیوݨ کیتے پرعزم ہن۔ انہاں اعلان کیتا جو یورپی یونین پاکستان بزنس فورم کوں مکمل طور تے فعال کیتا ویسی تے آندے سال دے پہلے نصف وچ اجلاس منعقد کیتا ویسی، جیڑھا اقتصادی تعاون دے ودھارے اچ سنگ میل ثابت تھیسی۔