پاکستان تے چین وچال تعاون دے معاہدے، چین اتھاں جدید زرعی ٹیکنالوجی متعارف کرویسی

اسلام آباد۔ 20 ستمبر (اے پی پی) پاکستان تے چین وچال تعلیم، ماحول تے زراعت دے شعبیں وچ تعاون دے معاہدیں دے تحت چین پاکستان وچ جدید زرعی ٹیکنالوجی متعارف کرویسی۔ اے پیشرفت اسپیشل انویسٹمنٹ فیسیلی ٹیشن کونسل (ایس آئی ایف سی) دے تعاون نال ممکن تھئی اے۔ جدید زرعی ٹیکنالوجی نال نہ صرف پاکستان دی زرعی پیداوار وچ ودھارا تھیسی بلکہ کاشتکاراں کیتے نویں روزگار دے موقع وی بݨسن ۔ تعلیم دے شعبے وچ تعاون دے ذریعے پاکستانی طلبہ کوں جدید تعلیمی سہولتاں، تربیتی موقع تے چینی یونیورسٹیاں وچ اسکالرشپ ݙتی ویسی جیندی وجہ نال نوجواناں دیاں صلاحتیاں وچ نکھارآسی۔ ماحولیاتی تبدیلی نال نبݨݨ کیتے ساوے ترقیاتی منصوبے وی شامل ہن جنہاں دی مدد نال پاکستان وچ پائیدار اقتصادی ترقی کوں ودھارا تے ماحول کوں بہتر بݨاوݨ وچ مدد ملسی۔ حاکماں موجب ایس آئی ایف سی دی معاونت نال اے منصوبے وقتی عملی شکل اختیار کریسن تے ملک وچ ترقی دا نواں دور شروع تھیسی