انجینئرز دا ملکی ترقی وچ کلیدی کردار، پاک سعودی دفاعی معاہدہ خطے کیتے گیم چینجر ثابت تھیسی، وزیر منصوبہ بندی پروفیسر احسن اقبال

لاہور20ستمبر(اے پی پی) وفاقی وزیر منصوبہ بندی، ترقی و خصوصی اقدامات پروفیسر احسن اقبال آکھیا جو پاک سعودی دفاعی معاہدہ خطے دی ترقی کیتے گیم چینجر ثابت تھیسی۔ پاکستانی انجینئرز ملک دے اصل معمار ہن، ملکی ترقی وچ انہاں دا کلیدی کردار اے۔ پاکستان دا دفاع ناقابل تسخیر اے اتے ایندا سہرا وی انجینئرز دے سر اے۔ ماضی وچ جیویں جو پاک چین اقتصادی راہداری (سی پیک) دے ذریعے ترقی دیاں راہواں کھلیاں، ایویں ای اڄوکا پاک سعودی معاہدہ ہک سنگ میل ثابت تھیسی۔ معرکہ حق دی وجہ نال دنیا وچ پاکستان دا ناں اُچا تھیا۔ اے ڳالھ انہاں فیڈریشن آف انجینئرنگ انسٹی ٹیوشنز آف پاکستان وچ منعقدہ تقریب وچ خطاب تے میڈیا نال ڳالھ مہاڑ دے دوران آکھی۔ ایں موقع تے انجینئر امیر ضمیر احمد خان، انجینئر محمد عثمان فاروق، انجینئر طاہر بشارت چیمہ، انجینئر سروش حشمت لودھی تے انجینئر قسیم قریشی سودھے ملک کنوں آئے انجینئرز دی وݙی تعداد موجود ہئی۔ پروفیسر احسن اقبال آکھیا جو معرکہ حق دے بعد ہُݨ پاکستان کوں معرکہ ترقی تے انوویشن جتݨا اے۔ جے اساں ہک میٹر دی بجائے ہک ہزار میٹر دی دوڑ جتݨی اے تاں ایندے کیتے معیشت کوں مضبوط کرݨا ہوسی اتے اپݨیاں مصنوعات کوں عالمی معیار تائیں پُڄاوݨا ہوسی۔ انہاں آکھیا جو پاکستان کوں ٹیکنالوجی دے میدان وچ اڳوں گھن ونڄݨ دی ذمہ واری وی انجینئرز تے عائد تھیندی اے۔ موسمیاتی تبدیلیاں دے نقصانات کنوں بچݨ، پاݨی دی حفاظت تے خوراک دے سلسلے دے تحفظ کیتے وی انجینئرز دا کردار بنیادی اہمیت رکھیندے ۔ وفاقی وزیر آکھیا جو اساں اپݨی معیشت کوں ایویں مضبوط بݨاوݨاں ہوسی جو موسمیاتی تبدیلیاں دے نقصانات گھٹ کنوں گھٹ تھیون۔ بنگلہ دیش دی مثال ݙیندے انہاں آکھیا جو اتھاں ہر سال قدرتی آفتاں آوݨ دے باوجود نقصانات دی شرح ٻہوں گھٹ اے، لہذا پاکستان وچ وی ایہو ماڈل اپݨاوݨ دی ضرورت اے۔ بجلی دے شعبے دی صورت حال تے ڳالھ کریندے انہاں آکھیا جو ایں شعبے دی اصلاح دی کنجی وی انجینئرز کنے اے۔ ارباں روپے دے بلیک ہولز کوں ختم کرݨا ہوسی تاں جو سرکلر قرضے تے قابو پاتا ونڄ سڳے اتے اے وسائل تعلیم تے صحت تے خرچ کیتے ونڄ سڳن۔ انہاں آکھیا جو نوجواناں تے عورتاں کوں بااختیار بݨاوݨ کیتے وی انجینئرنگ برادری دا کردار کلیدی اے۔ صحت دے شعبے وچ ٹیلی میڈیسن تے جدید ٹیکنالوجی دے ذریعے انقلاب برپا تھیندا پئے۔ ہر شعبہ انجینئرز دے گردآندا پئے۔ احسن اقبال آکھیا جو انجینئرنگ انسٹی ٹیوشنز کوں پاکستان دی ترقی دے چیمپئن بݨݨا ہوسی۔ اساݙی وزارت پل دا کردار ادا کریسی تاں جو انجینئرز دیاں ساری سفارشات کوں پالیسی وچ شامل کیتا ونڄ سڳے۔ اساں اپݨے سفر کوں کریش نہ تھیوݨ ݙیسوں بلکہ ترقی یافتہ ملکاں کنوں اڳوں نکلݨ دا ہدف حاصل کریسوں۔ انہاں آکھیا جو پاکستان دا خواب اے جو 2047 تائیں ملک ترے ٹریلین ڈالر دی معیشت بݨ ونڄے اتے ایں مقصد کیتے نوجواناں کوں ملکیت ݙیوݨی ہوسی۔ انہاں اعلان کیتا جو 2047 ‘نالج لیپ’ منصوبے دا جلد آغاز کیتا ویسی جیندا روڈ میپ نوجواناں دی مشاورت نال تیار کیتا ویسی تاں جو پاکستان دی تقدیر بدلی ونڄ سڳے۔ پروفیسر احسن اقبال آکھیا جو پاکستان دی ترقی دا سفر مالیاتی و معاشی عدم استحکام تے پالیسیاں دے تسلسل نہ ہووݨ دی وجہ نال رکیا پر ہُݨ ملک وچ سیاسی عدم استحکام دی کوئی گنجائش کائنی۔ ملک وزیر اعظم محمد شہباز شریف دی زیر قیادت ترقی آلے پاسے گامزن تھی چکے۔ پاکستان دے سارے اداریں کوں مسلح افواج دی پشت تے کھڑا تھیوݨا ہوسی تاں جو ترقی دے بج پھل بݨ سڳن۔ سعودی عرب دے نال اڄوکے دفاعی معاہدے تے ڳالھ کریندے انہاں ݙوہیں ملکاں دی قیادت کوں مبارخ  ݙیندے آکھیا جو پاک سعودی دفاعی معاہدہ خطے دی ترقی کیتے گیم چینجر ثابت تھیسی