صدر مملکت آصف علی زرداری دا کاشغر فری ٹریڈ زون دا دورہ

کاشغر20ستمبر(اے پی پی) صدر مملکت آصف علی زرداری کاشغر فری ٹریڈ زون دا دورہ کیتا۔ اے فری ٹریڈ زون چین دے صوبے سنکیانگ وچ اپݨی نوعیت دی واحد سہولت اے جیہڑی تجارت تے لاجسٹکس دا ہک اہم مرکز تصور کیتی ویندی اے۔ ایوان صدر دے پریس ونگ توں جاری بیان موجب کیمونسٹ پارٹی آف چائنہ (سی پی سی) پارٹی سیکریٹری کاشغر یاو نِنگ صدر مملکت آصف علی زرداری دا استقبال کیتا تے انہاں کوں 2015ء وچ زون دے قیام دے بعد تھیوݨ آلی ترقی تے بریفنگ ݙتی۔ صدر مملکت کوں ݙسایا ڳیا جو اے زون 3.56 مربع کلومیٹر تے محیط اے جتھاں کسٹمز کلیئرنس، ایئر فریٹ سروسز، بونڈڈ ویئرہاؤسنگ، لاجسٹکس تے پراسیسنگ جیاں سہولتاں ݙتیاں ویندین۔ زون دے تجارتی رابطے دنیا دے 118 ملکاں نال ہن اتے اتھوں الیکٹرک گاݙیاں، بیٹریاں، سولر سیلز، ہائی ٹیک مصنوعات تے آٹو پارٹس برآمد کیتے ویندن۔ بریفنگ وچ ݙسایا ڳیا جو اے فری ٹریڈ زون سڑک، ریل تے فضائی رستیں دے ذریعے ایشیا تے یورپ ݙوہیں نال جُڑیا ہویا اے تے ایندا اپݨا انٹرنیشنل ایئرپورٹ وی اے۔ اے زون سوست پورٹ (گلگت بلتستان) کنوں 400 کلومیٹر جݙاں جو گوادر پورٹ کنوں 2 ہزار کلومیٹر دے فاصلے تے واقع اے۔ صدر مملکت مختلف ملکاں دے اسٹالز تے کیوسکس دا دورہ وی کیتا جنہاں وچ وسطی ایشیائی ریاستاں، یورپی ملک، جنوبی کوریا تے جاپان شامل ہن۔ صدر مملکت کوں 2024ء وچ قائم کیتے ڳئے ڈیجیٹل ٹریڈ سینٹر دے بارے وچ ݙسایا ڳیا جیڑھا ایں ویلھے 5 ہزار 400 کنوں زائد کمپنیاں دا مرکز اے۔ انہاں کوں کراس بارڈر ای۔کامرس نمائش مرکز متعلق وی بریفنگ ݙتی ڳئی جتھاں وسطی ایشیا تے یورپ سودھے مختلف خطیں کنوں ڈیوٹی فری مصنوعات پیش کیتیاں ویندین۔ صدر مملکت آصف علی زرداری کوں “ݙو ملک، جاڑے پارکس” دے منصوبے تے وی بریفنگ ݙتی ڳئی جیندے تحت ازبکستان دے تعاون نال قائم انڈسٹریل پارک ویئرہاؤس کنوں ویئرہاؤس تئیں 72 گھنٹے وچ ترسیل دی سہولت ݙیندے ۔ انہاں کوں ݙسایا ڳیا جو کرغزستان دے تعاون نال ہک ٻیا صنعتی پارک وی تعمیر دے مرحلے وچ اے جیہڑا آٹوموٹیو اسمبلی تے ایل ای ڈی مصنوعات دی تیاری کریسی۔ صدر مملکت دے رلے سینیٹر سلیم مانڈوی والا، صوبائی وزیر سندھ سید ناصر حسین شاہ، پاکستان دے سفیر چین تے چین دے سفیر برائے پاکستان وی موجود ہن