اقتصادی سرگرمیاں دے روڈ میپ اچ نجی شعبے دی شمولیت کوں یقینی بݨایا ویسی، وزیراعظم شہباز شریف دا زوم تے اجلاس نال خطاب

لندن۔ 22 ستمبر (اے پی پی) وزیراعظم محمد شہباز شریف قابل عمل منصوبیاں دی نشاندہی کر تے انہاں کوں عملی شکل ݙیوݨ کیتے فوری اقدامات دی ہدایت کریندیں ہوئیں آکھیا جو زراعت، آئی ٹی، معدنات، سیاحت تے قابل تجدید توانائی اہم شعبے ہن جنہاں اچ بیرون ملکاں کنوں سرمایہ کاری آ سڳدی اے۔ اقتصادی سرگرمیاں دے روڈ میپ اچ نجی شعبے دا کلیدی کردار ہوسی تے انہاں دی شمولیت کوں یقینی بݨایا ویسی۔ اے ڳالھیں انہاں سنوار کوں پاکستان اچ سرمایہ کاری دے حجم، اقتصادی تے تجارتی سرگرمیاں دے فروغ کیتے اعلیٰ سطح دے اجلاس دی صدارت کریندیں ہوئے کیتی۔ لندن کنوں زوم تے تھیوݨ آلے اجلاس اچ وفاقی وزیر ماحولیات مصدق ملک، وفاقی وزیر پٹرولیم علی پرویز ملک، وفاقی وزیر خزانہ محمد اورنگزیب، وفاقی وزیر تجارت جام کمال، وزیر اطلاعات تے نشریات عطا اللہ تارڑ تے وفاقی وزیر اقتصادی امور احد خان چیمہ شریک تھئے۔ وزیراعظم آکھیا جو سارے اہم شعبیاں اچ سرمایہ کاری تے تجارت کوں فروغ ݙیوݨ کیتے قابل عمل منصوبیاں تے کم کیتا ویسی۔ زراعت، آئی ٹی، معدنات، سیاحت تے قابل تجدید توانائی اہم شعبے ہن جنہاں اچ بیرون ملکاں کنوں سرمایہ کاری آ سڳدی اے۔ انہاں آکھیا جو سرمایہ کاری دے نال نال تجارت کوں وی فروغ ݙیوݨ اساݙی پالیسی دا حصہ اے تانجو اساݙی درآمدات اچ خاطر خواہ اضافہ تھی سڳے۔ وزیراعظم آکھیا جو وزارتاں کوں ٹارگٹ ݙتے ڳئن تے سارے زیر تکمیل منصوبیاں کوں ویلھے تے مکمل کرݨ کیتے سارے وسائل لاوݨ دی ہدایت کیتی اے۔ انہاں آکھیا جو ایں مقصد کیتے مستقبل کوں مدنظر رکھیندے ہوئے ہک روڈ میپ تے تبدیلی دا ایجنڈا بݨایا ویسی تانجو آپݨے اہداف دے حصول کیتے ہک منظم انداز اچ اڳوں تے ٹُر سڳوں۔ اقتصادی سرگرمیاں دے روڈ میپ اچ نجی شعبے دا کلیدی کردار ہوسی تے انہاں دی شمولیت کوں یقینی بݨایا ویسی۔ اساݙی جاری معاشی تے اقتصادی اصلاحات دی پالیسی معیشت کوں ہک نویں سمت ݙتی اے تے ایں جدت تے شفافیت دی بدولت ملک ترقی دی راہ تے گامزن اے۔ وزیراعظم وزرا کوں ہدایت کیتی جو قابل عمل منصوبیاں دی نشاندہی کر تے انہاں کوں عملی شکل ݙیوݨ کیتے فوری اقدامات کیتے ونڄن۔