پاکستان صحت دے میدان اچ خود کفالت دے پاسے ودھدا پئے ، پارلیمان دی اولین ترجیح فارما انڈسٹری دے مسئلے مکاوݨ تے ترقی سانڳے سازگار ماحول ݙیوݨ اے، سید یوسف رضا گیلانی

اسلام آباد۔24ستمبر(اے پی پی) سینیٹ دے چیئرمین سید یوسف رضا گیلانی آکھیے جو سائنس داناں، مینوفیکچررز تے ریگولیٹرز دی محنت نال پاکستان صحت دے میدان وچ خود کفالت آلے پاسے ودھدا پئے۔ پارلیمان دی اولین ترجیح فارما انڈسٹری دے مسئلے مکاوݨ تے ترقی کیتے سازگار ماحول ݙیوݨ اے۔ مستقبل دی حکمتِ عملی وچ اختراع، اشتراک تے پائیداری کوں مرکزی حیثیت ݙیوݨی ہوسی۔او 8ویں پاکستان فارما سمٹ تے چوتھی فارما ایکسپورٹ سمٹ اینڈ ایوارڈز 2025 وچ خطاب کریندے پئے ہن۔ انہاں آکھیا جو ایں سال دا موضوع ’’صحت، ماحولیاتی تبدیلی تے لچک: بدلدی دنیا کیتے پاکستان دی فارما انڈسٹری دی تیاری‘‘ ٻہوں وقتی تے اہم اے۔انہاں آکھیے جو پاکستان فارما ایکسپورٹ سمٹ اینڈ ایوارڈز وچ ٹاپ 50 فارما ایکسپورٹرز کوں اعزازات نال نوازا ڳئے جیڑھی پاکستان کیتے ماݨ دی ڳالھ اے ۔ فارما ایکسپورٹرز تے کمپنیاں دی کامیابی ملک تے قوم کیتے باعثِ فخر اے۔چیئرمین سینیٹ آکھیے جو سائنس داناں، مینوفیکچررز تے ریگولیٹرز دی محنت نال پاکستان صحت دے میدان وچ خود کفالت آلے پاسے ودھدا پئے۔ گزریل مالی سال وچ فارماسیوٹیکل ایکسپورٹس 457 ملین ڈالر تے پڄ ڳئن جیندے وچ 34 فیصد ریکارڈ ودھارا تھئے، اے ݙو ݙھاکیں اچ ساریں توں وݙی نمو اے۔سید یوسف رضا گیلانی آکھیے جو پاکستان اڄ اپݨی دواسازی دی زیادہ تر ضرورتاں مقامی پیداوار نال پوری کریندا پئے، اے قومی کامیابی اے۔ پاکستانی کمپنیاں عالمی مارکیٹاں وچ قدم ڄمیندیاں پئن ، معیار، اعتماد تے تسلسل ساݙی سنڄاݨ اے۔انہاں آکھیے جو انڈسٹری وچ آرٹیفیشل انٹیلی جنس، ڈیجیٹل ہیلتھ پلیٹ فارمز تے جدید ٹیکنالوجی دا عمل دخل ودھدا پئے۔ حکومت APIs تے ڈیوٹیز وچ کمی تے PharmEx Pakistan جیھے اقدامات نال سازگار ماحول ݙتے۔انہاں آکھیے جو پارلیمان دی اولین ترجیح فارما انڈسٹری دے مسئلے حض کرݨ تے ترقی کیتے سازگار ماحول ݙیوݨ اے۔ فارما انڈسٹری کوں ودھارا ݙیوݨ کیتے پارلیمان قانون سازی تے پالیسی سازی وچ ہر ممکن تعاون کریسی۔انہاں آکھیا جو عالمی ماہرین تے غیر ملکی مندوبین دی شرکت پاکستان دی فارما انڈسٹری تے دنیا دے اعتماد دا اظہار اے۔ پاکستانی ایکسپورٹرز عالمی معیار تے ڈبلیو ایچ او سودھے اہم سرٹیفکیشنز حاصل کر تے نویں منڈیاں دے دروازے کھول ݙتن۔ مستقبل دی حکمتِ عملی وچ اختراع، اشتراک تے پائیداری کوں مرکزی حیثیت ݙیوݨی ہوسی۔ تحقیق و ترقی کوں مضبوط بݨا تے عالمی مقابلہ بازی وچ پاکستان دا مقام مزید اُچا کرݨا ممکن اے۔چیئرمین سینیٹ آکھیے پارلیمان، حکومت، صنعت، جامعات تے عالمی سٹیک ہولڈرز کوں رل تے ٹیکنالوجی ٹرانسفر تے جدت کیتے کردار ادا کرݨا ہوسی۔ پائیدار ترقی ای طویل المدتی لچک تے اعتماد دی ضمانت اے۔انہاں آکھیے جو پاکستان دی فارما انڈسٹری ٹریلین ڈالر دی عالمی مارکیٹ وچ وݙا حصہ حاصل کرݨ دی بھرپور صلاحیت رکھیندی اے۔ انہاں پی پی ایم اے قیادت تے پیسا ایوارڈز جتݨ آلیں کوں مبارخ ݙتی تے آکھیے جو تساں پاکستان کوں صحت مند تے تکڑا بݨیندے پیو ۔ اڄ دا ݙینھ صرف کامیابیاں دا جشن کائنی بلکہ مشترکہ مقصد تے ذمہ واری دی تجدید اے۔ آؤ رل تے پاکستان کوں عالمی ہیلتھ کیئر وچ ہک قابلِ اعتماد ناں بݨاؤں۔