وفاقی وزیر منصوبہ بندی پروفیسر احسن اقبال دی چین دے ہونان صوبے دے گورنر ماو ویمنگ نال ملاقات

اسلام آباد۔24ستمبر(اے پی پی)وفاقی وزیر منصوبہ بندی، ترقی و اصلاحات پروفیسر احسن اقبال آکھیے جو سائنس، ٹیکنالوجی تے معیشت دے میداناں وچ تعاون نال پاک چین دوستی نویں بلندیاں تے پڄدی پئی اے۔ سی پیک پاکستان کوں توانائی تے بنیادی ڈھانچے دے مسئلیں کنوں کڈھیے۔ سی پیک دے فیز ٹو وچ صنعت، جدید زراعت، معدنیات، سائنس و ٹیکنالوجی تے عوامی رابطے کوں ترجیح ݙتی ویندی پئی اے۔انہاں اے ڳالھ چین دے ہونان صوبے دے گورنر ماو ویمنگ نال ملاقات آکھی۔ ملاقات وچ ڈوہیں رہنماواں پاک چین تعاون کوں مزید وسعت ݙیوݨ تے سی پیک فیز ٹو دے تحت نویں شعبیں وچ شراکت داری تے ڳالھ مہاڑ کیتی ۔پروفیسر احسن اقبال آکھیے 20 کنوں ودھ ملکاں دے رہنماواں دی بی آر او سمٹ وچ شرکت خوش آئند اے۔ انہاں ہونان دے چین دی معیشت وچ مرکزی کردار کوں قابل تعریف قرار ݙتا تے آکھیے جو بی آر او سسٹم صنعتی ترقی کیتے جدید معلوماتی نظام ݙیندے۔ وفاقی وزیر آکھیے جو پاکستان بی آر او استعمال کرݨ آلا پہلا غیر ملکی ملک ہئی جیڑھا ݙوہیں ملکاں وچال گھاٹے اعتماد تے تکڑی دوستی دی علامت اے۔انہاں آکھیے جو پاک چین تعاون سائنس، ٹیکنالوجی تے معیشت دے میداناں وچ دوستی کوں نویاں بلندیاں تے پڄا ݙتے تے خلا و جدید ٹیکنالوجی دے نویں افق کوں پڄدا پئے ۔ انہاں مزید آکھیے جو سی پیک بیلٹ اینڈ روڈ انیشی ایٹو دا فلیگ شپ منصوبہ اے جیں پاکستان کوں توانائی تے انفراسٹرکچر دے مسئلیں کنوں کڈھیے۔ فیز ون وچ بنیادی ڈھانچے تے فزیکل منصوبیں تے توجہ ݙتی ڳئی جݙاں جو فیز ٹو وچ صنعت، جدید زراعت، معدنیات، سائنس و ٹیکنالوجی تے عوامی رابطے کوں ترجیح ݙتی ویندی پئی اے ۔پروفیسر احسن اقبال آکھیے جو جدید زراعت، ٹیکنالوجی، معدنیات تے ریلوے دے شعبیں وچ ہونان صوبے نال تعاون کوں ودھارا ݙتا ویسی تے ہونان صوبہ سی پیک فیز ٹو وچ مرکزی کردار ادا کر سڳدے۔ایں موقع تے گورنر ماو ویمنگ وفاقی وزیر دی سمٹ وچ شرکت تے شکریہ ادا کیتا تے آکھیا جو ہونان وچ وزیر احسن اقبال دی موجودگی پاک چین دوستی کوں ظاہر کریندی اے ۔ گورنر سی پیک فیز ٹو کیتے ہونان صوبے دے نال مستقل ورکنگ گروپ بݨاوݨ دی تجویز کوں وی منظور کر ڳھدا۔