وفاقی وزیر قانون و انصاف سینیٹر اعظم نذیر تارڑ نال یورپی یونین دے پاکستان اچ سفیر دی ملاقات

اسلام آباد، 24 ستمبر(اے پی پی) وفاقی وزیر قانون و انصاف تے انسانی حقوق سینیٹراعظم نذیر تارڑ نال یورپی یونین دے پاکستان وچ سفیر ہز ایکسیلینسی رائموندس کاروبلس انہاں دے دفتر وچ ملاقات کیتی۔ وزارت انسانی حقوق توں جاری پریس ریلیز موجب، وفاقی وزیر یورپی یونین دے سفیر دا خیرمقدم کیتا تے پاکستان وچ انسانی حقوق دے ودھارے تے تحفظ کیتے یورپی یونین دی مسلسل حمایت دی تعریف کیتی۔ملاقات دے دوران فریقین 2024ء وچ شروع تھیوݨ آلے “حقوقِ پاکستان فیز II (ای یو حقوقِ پاکستان II)” پروگرام دے تحت حاصل تھیوݨ آلی پیشرفت دا جائزہ ڳھدا۔ وفاقی وزیر ایں ڳالھ تے روشنی پاتی جو اے پروگرام حکومتی ڈھانچیں کوں تکڑا بݨاوݨ، قومی انسانی حقوق دے اداریں دی استعداد ودھاوݨ، انسانی حقوق نال تعلق رکھݨ آلی تعلیم تے آگاہی کوں ودھارا ݙیوݨ تے کاروبار وچ ذمہ دارانہ رویں دی حوصلہ افزائی تے مرکوز اے۔وفاقی وزیر سفیر کوں قومی ایکشن پلان انسانی حقوق تے وی بریف کیتا جیڑھا ایں ویلھے قانونی و پالیسی اصلاحات، انصاف تئیں رسائی، انسانی حقوق دی ترجیحات تے عملدرآمد، بین الاقوامی معاہدیں دی پاسداری، قومی اداریں کوں مستحکم بݨاوݨ تے مؤثر مانیٹرنگ میکنزم قائم کرݨ تے توجہ مرکوز کیتے ہوئی اے۔یورپی یونین دے سفیر رائموندس کاروبلس انہاں اقدامات دی تعریف کیتی تے پاکستان نال شراکت داری جاری رکھݨ دے عزم دی تصدیق کیتی۔ انہاں پروگرام دے تحت حاصل تھیوݨ آلی پیشرفت تے اطمینان دا اظہار کیتا تے ایں ڳالھ تے زور ݙتا جو یورپی یونین پاکستان دے انسانی حقوق دے ایجنڈے کوں مزید اڳوں ودھاوݨ وچ بھرپور تعاون جاری رکھیسی۔ملاقات وچ نومبر 2025ء وچ منعقد تھیوݨ آلے جی ایس پی پلس مانیٹرنگ مشن دی تیاریاں تے وی ڳالھ مہاڑ تھئی۔ ݙونہاں فریقین ایں ڳالھ تے اتفاق کیتا جو مثبت نتیجے گھنݨ سانڳے نیڑے تعاون تے تعمیری رابطے ناگزیر ہن۔ ملاقات خوشگوار ماحول وچ مُکی تے ݙونہاں طرفوں انسانی حقوق دے ودھارے تے پاکستان-یورپی یونین تعلقات کوں مزید مستحکم کرݨ دے عزم دی تصدیق کیتی ڳئی۔