پاکستان اتے اٹلی دی شراکت داری آپسی عزت اتے مسلسل ودھدے تعاون تے قائم اے، چیئرمین سینیٹ سید یوسف رضا گیلانی

اسلام آباد۔25ستمبر(اے پی پی(چیئرمین سینیٹ سید یوسف رضا گیلانی پاکستان اتے اٹلیوچال  پراݨے، گرمجوش اتے خوشگوار تعلقات دی تصدیق کریندے آکھیا جو ݙوہیں ملکاں دی شراکت داری آپسی عزت اتے مسلسل ودھدے تعاون تے قائم اے۔ انہاں اے ڳالھ پاکستان-اٹلی پارلیمانی فرینڈشپ گروپ دے چیئرمین سینیٹر سرمد علی ولوں اٹلی دی پاکستان کیتے سفیر مارلینا آرمیلن دے اعزاز اچ ݙتے ڳئے ظہرانے توں خطاب کریندے کیتی اے۔ چیئرمین سینیٹ آکھیا جو اٹلی یورپی یونین اچ پاکستان دے وݙے تجارتی شراکت داراں اچوں ہک اے، جئیں نال معاشی اتے سیاسی تعلقات کوں مزید مضبوط بݨاوݨ دی لوڑھ ٻئی ودھ ویندی اے۔ انہاں اٹلی اچ رہݨ آلی پاکستانی برادری دے کردار دی تعریف کیتی جیڑھا ݙوہیں ملکاں دے وچ پُل دا کردار ادا کریندی پئی اے۔ اٹلی دی سفیر ݙوہیں ملکاں دے ایواناں اچ قائم پارلیمانی فرینڈشپ گروپس دے کم دی تعریف کیتی تے اٹلی دی پارلیمان اچ اٹلی-پاکستان فرینڈشپ گروپ دی چیئرپرسن سارا فیراری ولوں نیک تمناواں دا پیغام پُچایا اے۔ انہاں امید ظاہر کیتی جو سارا فیراری وقتی ہی پاکستان دا دورہ کریسی۔ سفیر آکھیا جو چیئرمین سینیٹ اتے سینیٹ وفد گزریل سال اٹلی دے ݙو دورے کیتے ہن اتے یقین ظاہر کیتا جو اٹلی دی پارلیمان اتے سینیٹ دے اراکین وی خیرسگالی دے ایجھے ہی دورے کر تے ݙو پاسے تعلقات کوں مزید ودھیسن ۔ سینیٹر سرمد علی آپݨے خطاب اچ معزز سفیر دا شکریہ ادا کیتا اتے پارلیمانی وفداں دے تبادلیں کوں نیڑے دے تعاون دے ودھارے اچ اہم قرار ݙتے۔ انہاں امید ظاہر کیتی جو ݙوہیں فرینڈشپ گروپس وچ مسلسل رابطے پارلیمانی سفارت کاری کوں مضبوط بݨیسن اتے پاکستان-اٹلی شراکت داری کوں مزید مستحکم کریسن۔ ظہرانے اچ وفاقی وزیر قانون سینیٹر اعظم نذیر تارڑ، وزیر مملکت قانون بیرسٹر عقیل ملک، رکن قومی اسمبلی سید نوید قمر، سینیٹر شہادت اعوان اتے چیئرمین سینیٹ دی مشیر و سفیر پارلیمانی سپیکرز کانفرنس مصباح کھر وی شریک ہن