ڈپٹی چیئرمین سینیٹ سیدال خان دی وزیراعظم دے اڄوکے دوریں اچ پاکستان دے موقف کوں بھرپور انداز اچ چاوݨ تے مبارخ

اسلام آباد۔25ستمبر(اے پی پی) ڈپٹی چیئرمین سینیٹ سیدال خان وزیراعظم محمد شہباز شریف دے اڄوکے دورہ امریکہ اتے سعودی عرب دا خیر مقدم کیتے۔ انہاں آکھیا جو وزیراعظم نہ صرف پاکستان دا موقف بھرپور انداز اچ چاتے بلکہ ہر پاکستانی دی آواز کوں عالمی سطح تے موثر طریقے نال پیش کیتا۔ انہاں آکھیا جو وزیراعظم دا دورہ امریکہ ٻہوں کامیاب اتے تاریخی اہمیت رکھیندے ۔ وزیراعظم شہباز شریف دی امریکی صدر نال تھیوݨ آلی ملاقات پاکستان دے اعتماد، دفاعی تعاون اتے خارجہ پالیسی کیتے سنگِ میل ثابت تھیسی۔ ڈپٹی چیئرمین سینیٹ ایں موقع تے ایں ڳالھ تے وی زور ݙتا جو وزیراعظم پاک بھارت جنگ رکواوݨ تے امریکی صدر دا شکریہ ادا کیتا۔ انہاں دا آکھݨ ہئی جو بھارت دے بے بنیاد پروپیگنڈے ݙوہیں نیوکلیئر ملکاں کوں آمݨے سامݨے گھن آ کھڑا کیتا ہئی، لیکن امریکہ دی مثبت سفارت کاری خطے کوں ہک وݙے ایٹمی بحران توں بچایا۔ سینیٹ سیکرٹریٹ توں جاری بیان موجب سیدال خان آکھیا جو وزیراعظم دا دورہ امریکہ اتے سعودی عرب نہ صرف عالمی برادری اچ پاکستان دے تشخص کوں اڳوں گھن آوݨ دا ذریعہ بݨیے بلکہ ایں نال دنیا اچ پاکستان دا وقار اتے اعتماد وی ودھیے۔ انہاں توقع ظاہر کیتی جو وزیراعظم دیاں اعلیٰ سطحی ملاقاتاں نال خطے اتے عالمی سیاست اچ پاکستان دا کردار مزید تکڑا تھیسی۔ ڈپٹی چیئرمین سینیٹ وزیراعظم دے دورہ سعودی عرب کوں وی کامیاب اتے نتیجہ خیز قرار ݙیندے آکھیا جو پاکستان اتے سعودی عرب وچال اڄوکے دفاعی معاہدے خطے دی سلامتی، دہشت گردی مکاوݨ ، معیشت، سرمایہ کاری اتے تجارت دے شعبیں اچ نویں دور دا آغاز ثابت تھیسن۔ انہاں آکھیا جو انہاں معاہدیں دے پرے تئیں اثرات نہ صرف ݙوہیں ملکاں دی معیشت کوں تکڑا کریسن بلکہ عوام اتے قیادت وچال اعتماد اچ وی ودھارا تھیسی۔ انہاں آکھیا جو حرمین شریفین اتے مقدس مقامات دا تحفظ کرݨ نہ صرف اساݙا مذہبی فریضہ اے بلکہ ٻہوں وݙے اعزاز دی ڳالھ وی اے۔ایں توں انڄ ڈپٹی چیئرمین سینیٹ اسلام آباد اچ جمعیت علماء اسلام (ف) دے سربراہ اتے رکن قومی اسمبلی مولانا فضل الرحمان دے عشائیے اچ وی شرکت کیتی۔ عشائیے اچ جماعت دے سینیٹراں دے نال نال پاکستان اچ سعودی عرب دے سفیر نواف بن سعید احمد المالکی وی خصوصی شرکت کیتی۔ عشائیے دے دوران ملکی سیاسی صورتحال، پارلیمانی تعاون اتے قومی اتفاقِ رائے دے ودھارے تے تفصیل نال ڳالھ مہاڑ تھئی جݙاں جو سعودی سفیر دی موجودگی ݙوہیں بھرا ملکاں دے تعلقات تے معنی خیز اتے نتیجہ خیز ڳالھ مہاڑ دا موقع ݙتا۔ ڈپٹی چیئرمین سینیٹ سیدال خان آپݨے بیان دے چھیکڑ تے آکھیا جو وزیراعظم شہباز شریف دی قیادت اچ پاکستان دے اڄوکے دورے عالمی سطح تے پاکستان دے بہتر اتے روشن مستقبل دی ضمانت ہن اتے اے خطے اچ ترقی، استحکام اتے تعاون دے نویں دور دا پیش خیمہ ثابت تھیسن۔