امریکی صدر ڈونلڈ ٹرمپ اتے ترک صدر طیب اردوان دی ملاقات

واشنگٹن۔26 ستمبر(اے پی پی)امریکی صدر ڈونلڈ ٹرمپ ترکیہ کوں امریکا دا اہم شراکت دار قرار ݙتے۔ ترک صدر طیب اردوان امریکی صدر نال ملاقات کیتے وائٹ ہاؤس پڄے جتھاں امریکی صدر انہاں دا پرتپاک استقبال کیتا۔ ݙوہاں رہنماواں ݙو طرفہ تعلقات، دفاعی معاہدیاں، غزہ اتے یوکرین تے ڳالھ مہاڑ کیتی۔ امریکی صدر ڈونلڈ ٹرمپ اتے ترک صدر رجب طیب اردوان دی مشترکہ پریس کانفرنس بین الاقوامی میڈیا دی توجہ دا مرکز بݨ ڳئی۔ ایں موقع تے ٹرمپ واضح کیتا جو انہاں دی ڳالھ مہاڑ اچ ایف-16 اتے ایف-35 طیاریاں بارے معاملے شامل ہوسن اتے او چاہندن جو ترکیہ روس توں تیل دی خریداری ختم کرے۔ ٹرمپ روسی صدر ولادیمیر پیوٹن تے زور ݙیندے آکھیا جو ہݨ ویلھا آڳئے جو یوکرین دے خلاف جنگ بندی دا اعلان کیتا ونڄے، کیونڄو روس ولوں جاری ہنگامہ آرائی خطے اتے دنیا دے امن کیتے سنگین خطرہ بݨدی ویندی اے۔ ٹرمپ صدر اردوان کوں انتہائی قابل احترام شخصیت قرار ݙتا اتے آکھیا جو امریکا ترکیہ نال وݙے تجارتی معاہدیاں تے دستخط کرݨ کیتے تیار اے۔ انہاں دا آکھݨ ہا جو اے شراکت داری نہ صرف اقتصادی تعلقات کوں مضبوط کریسی ٻھل دفاعی شعبے اچ وی نویں مواقع پیدا کریسی۔ ترک صدر اردوان وی ہتھیاراں دے کئی معاہدیاں تے ڳالھ مہاڑ دی تصدیق کیتی اتے آکھیا جو اے شراکت داری ݙوہیں ملکاں دے مفاد اچ اے۔ ٹرمپ ہک واری ول روس کوں خبردار کیتا جیکر یوکرین دے خلاف جنگ بند نہ کیتی ڳئی تاں ترکی روسی تیل دی درآمد روکݨ تے مجبور تھی ویسی۔ پریس کانفرنس اچ امریکی صدر دے بیاناں واضح کیتا جو امریکا خطے اچ روس دے ودھدے اثرورسوخ کوں روکݨ کیتے ترکی کوں کلیدی شراکت دار دے طور تے ݙیھدا پئے۔