پاکستان اتے روس وچال پہلی مال گاݙی دے شیڈول کوں چھیکڑی شکل ݙیوݨ کیتے ڳالھ مہاڑ جاری

اسلام آباد۔26ستمبر(اے پی پی) پاکستان اتے روس وچال پہلی پائلٹ مال گاݙی دے شیڈول کوں چھیکڑی شکل ݙیوݨ کیتے ڳالھ مہاڑ جاری اے جیڑھے آپݨے اڄوکے سفراچ16  کنٹینرز تے مشتمل چاول دی کھیپ گھن تے ٹُرسی۔ اے منصوبہ9 ویں بین الحکومتی کمیشن (آئی جی سی) دے تلے شروع کیتا ڳئے جیں دا مقصد کراچی بندرگاہ کوں ایران، ترکمانستان اتے قازقستان دے رستے ماسکو نال جوڑݨا اے۔ مئی 2025 اچ پاکستان ریلوے اتے روسی ریلوے (آر زیڈ ڈی) وچال معاہدہ تھیا ہئی جیں ایں تاریخی سروس دا رستہ ہموار کیتے۔ ویلتھ پاکستان کوں موجود سرکاری دستاویزات موجب چاول دے کنٹینرز جون اچ روانگی کیتے تیار کرڳھدے ڳئن لیکن خطے دی صورتحال پاروں تاخیر تھی ڳئی، ہݨ ݙوہیں ملکاں وچال نویں روانگی دی تاریخ طے کرݨ تے ڳالھ مہاڑ جاری اے۔ پیش کیتے ڳئے کوریڈور دی لمبائی 7,000 کلومیٹر توں تھوڑی جیہی زیادہ ہوسی اتے اندازہ اے جو مال گاݙی20 توں 25 ݙینھ اچ ماسکو پُڄیسی جݙاں جو فی کنٹینر لاڳت تقریباً 5,600 امریکی ڈالر ہوسی۔ اے منصوبہ سمندری رستے دے مقابلے اچ تکھا اتے گھٹ لاڳت دا متبادل ݙیسی اتے پاکستانی زرعی اجناس کیتے روس اتے وسطی ایشیائی منڈیاں دے دروازے کھولیسی۔ پائلٹ ٹرین کوں مستقل زمینی تجارتی رستہ قائم کرݨ دے پاسے پہلا قدم قرار ݙتا ویندا پئے جو پاکستان دے علاقائی تجارتی کردار کوں مزید تکڑا بݨیسی۔ ریلوے کوریڈور دی بدولت ترسیل دا ویلھا سمندری رستے دے 35 توں 45 ݙینھ دے مقابلے اچ صرف 20 توں 25 ݙینھ رہ ویسی جݙاں جو لاڳت اچ وی کمی آسی جیں نال روسی اتے وسطی ایشیائی منڈیاں اچ پاکستانی مصنوعات مزید مسابقتی تھی سڳسن۔