نیویارک۔27ستمبر(اے پی پی)وزیر اعظم محمد شہباز شریف اقوامِ متحدہ دے مرکزی کردار نال کثیرالجہتی نظام کوں مضبوط بݨاوݨ کیتے پاکستان دے پکے عزم دا اعادہ کریندے ہوئیں آکھیے جو پاکستان اقوامِ متحدہ دی سلامتی کونسل دے رکن دی حیثیت نال علاقائی و عالمی امن و سلامتی کیتے اپݨا تعمیری کردار ادا کریندا رہسی۔ دنیا کوں رَل تے مزید موسمیاتی مالی وسائل متحرک کرݨے چاہیدن، جموں و کشمیر تنازعہ دا اقوامِ …
پاکستان اقوامِ متحدہ دی سلامتی کونسل دے رکن دی حیثیت نال علاقائی و عالمی امن و سلامتی کیتے اپݨا تعمیری کردار ادا کریندا رہسی، وزیر اعظم محمد شہبازشریف
نیویارک۔27ستمبر(اے پی پی)وزیر اعظم محمد شہباز شریف اقوامِ متحدہ دے مرکزی کردار نال کثیرالجہتی نظام کوں مضبوط بݨاوݨ کیتے پاکستان دے پکے عزم دا اعادہ کریندے ہوئیں آکھیے جو پاکستان اقوامِ متحدہ دی سلامتی کونسل دے رکن دی حیثیت نال علاقائی و عالمی امن و سلامتی کیتے اپݨا تعمیری کردار ادا کریندا رہسی۔ دنیا کوں رَل تے مزید موسمیاتی مالی وسائل متحرک کرݨے چاہیدن، جموں و کشمیر تنازعہ دا اقوامِ متحدہ دی سلامتی کونسل دیاں قرارداداں موجب منصفانہ اتے پرامن حل تلاش کیتا ونجے۔ انہاں اے ڳالھ اقوامِ متحدہ دی جنرل اسمبلی دے 80ویں اجلاس دے موقع تے اقوامِ متحدہ دے سیکرٹری جنرل انتونیو گوتریش نال ملاقات اچ آکھی۔ وزیر اعظم آفس دے میڈیا ونگ دے جاری بیان موجب، وزیر اعظم محمد شہباز شریف نیویارک اچ اقوامِ متحدہ دی جنرل اسمبلی دے اجلاس دے موقع تے اقوامِ متحدہ دے سیکرٹری جنرل انتونیو گوتریش نال ملاقات کیتی۔ گرم جوش اتے خوشگوار ماحول اچ تھیوݨ آلی ملاقات اچ وزیر اعظم اقوامِ متحدہ دے مرکزی کردار نال کثیرالجہتی کوں مضبوط بݨاوݨ کیتے پاکستان دے پکے عزم دا اعادہ کیتا تاں جو دنیا دے اہم ترین مسئلیاں دے حل اچ مدد مل سڳے۔ وزیر اعظم بین الاقوامی امن و استحکام دے فروغ اتے ترقی پذیر ملکاں دی آواز کوں مؤثر بݨاوݨ اچ سیکرٹری جنرل دی شاندار قیادت اتے اقوامِ متحدہ دے کردار دی تعریف کیتی۔ وزیر اعظم پاکستان اچ حالیہ تباہ کن سیلاب دے دوران حکومت دی امدادی اتے ریسکیو کوششاں دی تعریف کرݨ تے سیکرٹری جنرل دا شکریہ ادا کیتا اتے زور ݙیتا جو دنیا کوں رَل تے مزید موسمیاتی مالی وسائل متحرک کرݨے چاہیدن تاں جو پاکستان جھیں موسمیاتی لحاظ نال کمزور ملکاں تے ماحولیاتی تبدیلیاں دے اثرات گھٹ کیتے ونڄ سڳن۔ وزیر اعظم پاکستان کیتے اہم قومی و علاقائی مسئلیاں تے وی گالھ کیتی، جیںدے اچ جموں و کشمیر تنازعہ، سندھ طاس معاہدے دی خلاف ورزیاں اتے پاکستان اچ بیرونی حمایت یافتہ دہشت گردی شامل ہین۔ انہاں جموں و کشمیر تنازعہ دا اقوامِ متحدہ دی سلامتی کونسل دیاں قرارداداں موجب منصفانہ اتے پرامن حل ڳولݨ تے زور ݙیتا۔ وزیر اعظم حالیہ پاک بھارت کشیدگی اچ کمی گھن آوݨ کیتے سیکرٹری جنرل دی قیادت اتے مخلصانہ کوششاں دی تعریف کیتی۔ وزیر اعظم غزہ دی سنگین صورتحال تے چنتا کریندے ہوئیں فوری جنگ بندی، انسانی امداد دی فراہمی اتے فلسطینی ریاست دے قیام کیتے ناقابلِ واپسی سیاسی عمل شروع کرݨ دی کوششاں دی حمایت دا اعادہ کیتا۔ وزیر اعظم ایں عزم کوں وی دہرایا جو پاکستان اقوامِ متحدہ دی سلامتی کونسل دے رکن دی حیثیت نال علاقائی و عالمی امن و سلامتی کیتے اپݨا تعمیری کردار ادا کریندا رہسی۔ سیکرٹری جنرل اقوامِ متحدہ اچ پاکستان دے مضبوط موقف اتے اہم کردار دی تعریف کیتی، خاص طور تے سلامتی کونسل اچ اختیار کیتے ڳئے اصولی مؤقف کوں خراجِ تحسین پیش کیتا۔ ݙوہیں رہنماواں ایں گالھ تے اتفاق کیتا جو دنیا اچ امن اتے ترقی کوں فروغ ݙیوݨ کیتے اقوامِ متحدہ دے لازمی کردار کوں مزید ودھاوݨ اتے مضبوط کرݨ دی لوڑھ اے۔
