اسحاق ڈار نال متحدہ عرب امارات دے نائب وزیراعظم، سعودی عرب دے وزیرخارجہ اتے مراکش دے وزیر خارجہ اڄوکے ہفتے ٹیلی فون تے ڳالھ مہاڑ، ترجمان دفتر خارجہ

اسلام آباد۔24 اکتوبر(اے پی پی) وزارت خارجہ دے ترجمان آکھیا جو نائب وزیراعظم تے وزیرخارجہ سینیٹر محمد اسحاق ڈار نال متحدہ عرب امارات دے نائب وزیراعظم تے وزیرخارجہ شیخ عبداللہ بن زید النہیان، سعودی عرب دے وزیرخارجہ شہزادہ فیصل بن فرحان السعود تے مراکش دے وزیر خارجہ ناصر بوریتا اڄوکے ہفتے ٹیلیفون تے ڳالھ مہاڑ کیتی۔ اے ڳالھ انہاں اتھاں پریس بریفنگ وچ ݙسائی۔ انہاں آکھیا جو متحدہ عرب امارات دے نائب وزیراعظم پچھلی رات نائب وزیراعظم تے وزیر خارجہ سینیٹر محمد اسحاق ڈار نال ٹیلیفون تے ڳالھ کیتی، ݙوہیں رہنماواں سانجھی دلچسپی دے ݙو طرفہ، کثیرالجہتی معاملات دے نال نال اڄوکی علاقائی تے عالمی پیش رفت تے ڳالھ مہاڑ کیتی تے نیڑے رابطے وچ رہݨ تے اتفاق کیتا۔ انہاں آکھیا جو سینیٹر محمد اسحاق ڈار 21 اکتوبر کوں سعودی عرب دے وزیر خارجہ شہزادہ فیصل بن فرحان السعود دے نال ٹیلی فون تے ڳالھ مہاڑ کیتی، آپݨی اڄوکی ڳالھ مہاڑ دی بنیاد تے ݙوہائیں رہنماواں غزہ تے فلسطین سودھے  اڄوکی علاقائی پیش رفت دا جائزہ ڳھدا تے سانجھی دلچسپی دے معاملات تے نیڑے رابطے اچ رہݨ تے اتفاق کریندے خطے وچ امن تے استحکام کوں ودھارا ݙیوݨ کیتے آپݨے مشترکہ عزم دا اعادہ کیتا۔ ترجمان آکھیا جو نائب وزیراعظم کوں 21 اکتوبر کوں مراکش دے وزیرخارجہ ناصر بوریتا ٹیلی فون کیتا، ݙوہیں رہنماواں اقوام متحدہ دی جنرل اسمبلی دے موقع تے آپݨی اڄوکی ملاقات دا ذکر کریندے سانجھی دلچسپی دے شعبیں اچ ݙوطرفہ تعاون کوں مزید تکڑا بݨاوݨ دے آپݨے پختہ عزم دا اعادہ کیتا۔ نائب وزیراعظم تے وزیر خارجہ سینیٹر محمد اسحاق ڈار نے وزیر خارجہ ناصر بوریتا کوں دورہ پاکستان دی دعوت ݙتی جیڑھی انہاں قبول کیتی۔