پی آئی اے دی مانچسٹر کیتے براہ راست پروازاں دا آغاز، اے پیش رفت پاک برطانیہ تعلقات اچ تاریخی سنگ میل اے، وزیر دفاع خواجہ آصف

اسلام آباد۔ 25 اکتوبر (اے پی پی) حکومت پاکستان دی ہک وݙی کامیابی دے طور تے پاکستان انٹرنیشنل ایئرلائن (پی آئی اے) اسلام آباد توں مانچسٹر تک براہ راست پروازاں دا باضابطہ آغاز کر ݙتا۔ اے پیش رفت پاکستان دی فضائی صنعت تے برطانیہ نال ݙو پاسہ تعلقات اچ ہک تاریخی سنگ میل اے۔ پہلی پرواز دا افتتاح وفاقی وزیر دفاع خواجہ محمد آصف اسلام آباد انٹرنیشنل ایئر پورٹ تے تھیوݨ آلی ہک پروقار تقریب اچ کیتا۔ ایں موقع تے پاکستان اچ برطانیہ دے ہائی کمشنر جین مرمیٹ، سیکرٹری دفاع جنرل (ر) محمد علی، ڈی جی سول ایوی ایشن اتھارٹی (سی اے اے) نادر شفقت ڈار تے دفاع تے ہوابازی دے اعلیٰ حکام موجود ہن۔ وزیر دفاع خواجہ محمد آصف تقریب اچ خطاب کریندیں ہوئیں آکھا جو اے اقدام حکومت پاکستان ولوں توں قومی اداریاں دی بحالی، عوامی سہولتاں اچ بہتری تے بین الاقوامی سطح تے پاکستان دے تشخص دے فروغ کیتے کیتے ڳئے اقدامات دا تسلسل اے۔ انہاں آکھیا جو اسلام آباد توں مانچسٹر براہ راست پرواز دا آغاز پاکستان تے برطانیہ وچال رابطے دے نویں دور دا آغاز اے جیہڑا اتھ موجود پاکستانی کمیونٹی کیتے وݙی سہولت فراہم کریسی۔ خواجہ محمد آصف ایں موقع تے ڈی جی سی اے اے نادر شفقت ڈار، ایوی ایشن ڈویژن تے پی آئی اے دی انتظامیہ دی خدمات کوں سراہیندیں ہوئیں آکھیا جو انہاں دی انتھک محنت تے پیشہ ورانہ کارکردگی پاروں اے اہم کامیابی ممکن تھئی۔ انہاں آکھیا جو اے پیش رفت حکومت پاکستان دی مؤثر حکمت عملی تے ادارہ جاتی تعاون دا نتیجہ اے۔ اسلام آباد توں مانچسٹر براہ راست پرواز دا آغاز پاکستان دی فضائی صنعت کیتے ہک تاریخی پیش رفت اے جیہڑی ڈوہیں ملکاں وچال تجارت، سیاحت تے ثقافتی تعلقات کوں ٻیا مضبوط کریسی۔