روایات دی دھناں” دے عنوان نال سالانہ لوک میلہ 7 نومبر توں لوک ورثہ، اسلام آباد اچ شروع تھیسی

اسلام آباد۔26 اکتوبر (اے پی پی) ہک واری ولا اسلام آباد دا دل رنگاں، دھناں تے ثقافت و روایات دے قمقماں نال جگمگاوِݨ آلا اے کیوںجو لوک ورثہ، شکر پڑیاں اچ سالانہ لوک میلہ 7 توں 16 نومبر تک تھیسی جو ملکی تے غیر ملکی زائرین کوں پاکستان دے بھرپور ثقافتی ورثے دے جشن مناوݨ کیتے خوش آمدید آکھسی۔ اسلام آباد دا اے سالانہ لوک میلہ جو 7 توں 16 نومبر تک جاری راہسی، روایتی موسیقی، دستکاریاں تے ثقافتی مظاہریاں دے ذریعے عوام کوں پاکستان دی متنوع ثقافت دا تجربہ فراہم کریسی۔ اتوار کوں مقامی میڈیا تے ریڈیو پاکستان دے مطابق اے میلہ ملک دے ثقافتی ورثے دی بھرپور نمائندگی کریسی جیندے اچ ملک بھر توں آئے ہوئے کاریگر، لوک فنکار تے موسیقار آپݨی صلاحیتاں دے جوہر ݙکھیسن۔ زائرین کوں روایتی دستکاریاں، موسیقی، رقص تے ٻئی ثقافتی سرگرمیاں دے رنگاں نال سجیا ہک جاندار ماحول ݙیکھݨ کوں ملسی۔ اے میلہ نیشنل انسٹی ٹیوٹ آف فوک اینڈ ٹریڈیشنل ہیریٹیج (لوک ورثہ) ولوں کیتا ویندا پئے۔ حکام مطابق ایں سال دا میلہ لوک ورثہ دے قیام دی گولڈن جوبلی دی خوشی اچ منایا ویسی۔ ایں موقع تے ادارے دی گزریل پنج ݙہاکیاں تے محیط خدمات کوں خراجِ تحسن پیش کیتا ویسی۔ ہر سال دی طرح اسلام آباد دے شہریاں تے ملک بھر توں آوݨ آلے مہماناں کوں لوک موسیقی، روایتی رقص تے دستکاریاں دی نمائشاں سودھے مختلف ثقافتی پروگراماں توں لطف اندوز تھیوݨ دا موقع ملسی۔ اے میلہ خانداناں، فنون لطیفہ دے شائقین تے سیاحاں کیتے رنگاں نال بھریا ہک حسین تجربہ فراہم کریسی۔ چاریں صوبیاں دے علاوہ گلگت بلتستان تے آزاد جموں تے کشمیر دے خصوصی پوائنٹس وی قائم کیتے ویسن جتھ علاقائی دستکاریاں، لوک موسیقی تے روایتی پکوان پیش کیتے ویسن۔ بین الاقوامی رنگ شامل کرݨ کیتے میلے اچ 12 ملکاں دے نمائندے وی خصوصی پوائنٹ دے ذریعے شرکت کریسن۔ منتظمین سیکیورٹی، ریفریشمنٹ تے زائرین دی سہولت کیتے جامع انتظامات کیتن۔