پاکستان ہر عالمی فورم تے کشمیر دی حمایت پوری قوت نال جاری رکھیسی، وفاقی وزیر داخلہ محسن نقوی دا سنیھا

اسلام آباد۔27اکتوبر (اے پی پی) وفاقی وزیر داخلہ محسن نقوی یومِ سیاہ کشمیر دے موقع تے کشمیری عوام نال بھرپور یکجہتی دا اظہار کریندیں ہوئیں آکھیا جو پاکستان، کشمیری عوام دی سیاسی، سفارتی اتے اخلاقی حمایت ہر عالمی فورم تے پوری قوت نال جاری رکھیسی ۔ آپݨے بیان اچ انہاں آکھیا جو 27 اکتوبر او ݙینھ اے جݙاں بھارت جموں و کشمیر تے غیر قانونی قبضہ کر تے تاریخ دا سیاہ ترین باب رقم کیتا۔ بھارتی افواج 1947 توں مقبوضہ وادی کوں ظلم، جبر اتے ریاستی دہشت گردی دے عقوبت خانے اچ بدل ݙتے ۔ انہاں آکھیا جو پیلٹ گنز، جبری گمشدگیاں، ماورائے عدالت قتل اتے تذلیل بھارتی مظالم دا لرزہ خیز مکروہ چہرہ ہن ۔ محسن نقوی کشمیری شہداء، حریت رہنماواں، اسیران اتے مظلوم خانداناں کوں سلام پیش کریندیں ہوئیں آکھیا جو اُنجھ بہادر لوکاں بھارتی ظلم دے سَمویں سَر نئی جھُکایا ۔ انہاں آکھیا جو ہزاراں کشمیری نوجوان آزادی دی قیمت آپݨی جاناں نال ݙتی اے لیکن جذبہ حریت اڄ وی اونویں اے۔ وفاقی وزیر داخلہ آکھیا جو میڈیا بلیک آؤٹ، انٹرنیٹ بندش اتے فوجی محاصرے وادی کوں قید خانے اچ بدل ݙتے جِتھ ہر آواز دبائی ویندی پئی اے۔ عالمی انسانی حقوق دی تنظیماں بھارت دے مظالم تے کئی واری آواز چاتی اے لیکن دنیا دی چپ انصاف دے عالمی نظام تے ہک سوالیہ نشان اے۔ محسن نقوی آکھیا جو اقوام متحدہ دی قرارداداں واضح طور تے تسلیم کریندن جو کشمیری عوام کوں آپݨے مستقبل دا فیصلہ آپ کرݨ دا حق حاصل اے لیکن بھارت ایں قرارداداں کوں پامال کر تے نہ صرف عالمی قانون بلکہ انسانیت دی حرمت کوں وی مجروح کیتے۔ وفاقی وزیر داخلہ محسن نقوی آکھیا جو پاکستان ظلم دے خلاف کشمیری عوام دی جدوجہد اچ ہمیشہ انہاں دے نال کھڑا رہیسی ۔ انہاں آکھیا جو ایں کشمیری عوام دی جدوجہد پاکستان دے دل دی دھڑکن اے۔