وفاقی وزیر تجارت جام کمال خان نال امریکی ٹیکنالوجی کمپنی میٹا دے وفد دی ملاقات، ڈیجیٹل تجارت، ای کامرس اَتے مصنوعی ذہانت دے شعبیاں اِچ تعاون بارے گالھ مہاڑ کیتی ڳئی

اسلام آباد۔29اکتوبر (اے پی پی) وفاقی وزیر تجارت جام کمال خان نال امریکی ٹیکنالوجی کمپنی میٹا دے ہِک وفد ڈائریکٹر پبلک پالیسی (جنوبی ایشیا) رافیل فرانکل دی قیادت اچ بُدھ کوں وزارت تجارت اِچ ملاقات کیتی جیندے اِچ ڈیجیٹل تجارت، ای کامرس اَتے مصنوعی ذہانت (اے آئی) اِچ تعاون دے حوالے نال گالھ مہار کیتی ڳئی، اِیں موقعے تے وزیر اعظم دے معاون خصوصی برائے تجارت رانا احسان افضل وی موجود ہَن۔ وفد دا خیر مقدم کریندیں ہوئیں جام کمال خان پاکستان دی ڈیجیٹل تبدیلی دی حمایت اِچ میٹا دی شراکت داری کوں سراہیا۔ انہاں آکھیا جو پاکستان دی نینگر آبادی جنوبی ایشیا اِچ ساریاں توں تکھّی ترقی کرݨ آلی معیشتاں اِچوں ہِک اے جیڑھی جو نویں ݙیجیٹل معیشت، ودھدی ہوئی کنیکٹیویٹی اَتے ہِک مضبوط آئی ٹی ٹیلنٹ بیس دے ذریعے سالانہ 75,000 توں وَدھ گریجویٹس تیار کریندی اے۔ وفاقی وزیر وفد کوں ای کامرس کوں مضبوط کرݨ، آئی ٹی برآمدات کوں ودھاوݨ اَتے اے آئی کوں قومی معیشت اچ رلاوݨ کیتے وزارت دے اقدامات توں آگاہ کیتا۔ وفاقی وزیر میٹا کوں وزارت دی آئی ٹی سیکٹرل کونسل دے ذریعے AI اخلاقیات، ڈیجیٹل حفاظت اَتے ای کامرس دے معیاراں سویں شعبیاں تے تعاون کرݨ دی دعوت ݙتی۔ جام کمال خان اے آئی پالیسی اَتے گورننس اِچ پاکستان دی حالیہ پیشرفت تے روشنی پاتی، جیندے اِچ نیشنل اے آئی پالیسی 2025، اڑان پاکستان اقدام اَتے ڈیجیٹل نیشنل پاکستان (DNP) ایکٹ 2025 شامل ہِن، جنہاں دا مقصد چھوٹے اَتے درمیانے درجے دے کاروباراں اَتے برآمدات کوں سپورٹ کرݨ کیتے اخلاقی، شفاف اَتے جامع اے آئی کوں اپناوݨ کوں ودھاوݨ اے۔ انہاں میٹا کوں نینگراں کوں ہدف بݨاوݨ آلے اے آئی سکلنگ پروگراماں اِچ پاکستان نال شراکت کرݨ اَتے ڈیجیٹل انٹرپرینیورشپ کوں مضبوط کرݨ کیتے Meta-Pakistan E-Commerce Accelerator Pilot کوں لَبھݨ دی دعوت ݙتی۔رافیل فرینکل ڈیجیٹل تبدیلی اِچ پاکستان دی پیشرفت کوں سراہندے ہوئیں اے آئی نال چَلݨ آلی ڈیجیٹل جدت، مہارت دی ترقی اَتے ایس ایم ای سپورٹ اِچ تعاون ودھاوݨ اچ میٹا دی دلچسپی دا اظہار کیتا۔ انہاں میٹا بوسٹ سویں پروگراماں دے ذریعے پاکستانی کاروباری لوکاں اَتے چھوٹے کاروباراں کوں بااختیار بݨاوݨ کیتے میٹا دے عزم دا اعادہ کیتا۔