طالبان حکومت صرف آپݨی قابض حکمرانی اَتے جنگی معیشت کوں بچاوݨ کیتے افغانستان کوں ہِک ٻئے جھیڑے اچ پیندی پئی اے، وزیر دفاع خواجہ محمد آصف

اسلام آباد۔29اکتوبر (اے پی پی) وزیر دفاع خواجہ محمد آصف افسوس  کریندیں ہوئیں آکھیا جو طالبان رجیم صرف آپݨی قابض حکمرانی اَتے جنگی معیشت کوں بچاوݨ کیتے افغانستان کوں ہِک ٻئے جھیڑے اچ پیندی پئی اے، پاکستان آپݨی زمین تے کہیں وی دہشت گردی یا خودکُش حملے کوں برداشت نہ کریسی اَتے کہیں وی مہم جوئی دا جواب سخت ہوسی۔ بُدھ کوں استنبول مذاکرات دے بے نتیجہ تھیوݨ تے آپݨے بیان اِچ انہاں آکھیا جو افغان طالبان رجیم لگاتار بھرا ملکاں نال مذاکرات کیتے درخواست کریندی پئی ہئی، بھرا ملکاں دی درخواست تے پاکستان افغان طالبان رجیم نال امن دی خاطر مذاکرات دی پیشکش کوں قبول کیتا۔ وزیر دفاع آکھیا جو کُجھ افغان حکام دے زہریلے بیانات اے ݙسیندِن جو طالبان رجیم اِچ اِنتشار اَتے دھوکہ دہی موجود اے، پاکستان اے واضح کریندے جو طالبان رجیم کوں ختم کرݨ یا انہاں کوں غاراں اِچ لُکݨ تے مجبور کرݨ کیتے پاکستان کوں آپݨی پُوری طاقت استعمال کرݨ دی ہرگز لوڑھ نئیں، اگر لوڑھ پئی تاں اساں انہاں کوں تھورا بورا سویں جھاڑیاں تے شکست ݙے تے لوکاں کیتے ہِک مثال بݨا سڳدوں جیڑھا جو عالمی قوماں کیتے دلچسپ منظر ہوسی۔ انہاں آکھیا جو افسوس تھیندے جو طالبان رجیم صرف آپݨی قابض حکمرانی اَتے جنگی معیشت کوں بچاوݨ کیتے افغانستان کوں ہِک ٻئے جھیڑے اچ پاوݨ چاہندی اے، آپݨی کمزوری اَتے جنگی دعویاں دی حقیقت کوں جاݨدے ہوئیں جنگ دا طبل وَجا تے بظاہر افغان عوام اِچ آپݨی خراب تھیندی ساکھ بچاوݨ دی ناکام کوشش کریندے پئن۔ اگر افغان طالبان ولا وی افغانستان اَتے اِین٘دے معصوم عوام کوں تباہ کرݨ تے بضد ہِن تاں جو وی تھیوݨے، او تھیوے۔ انہاں آکھیا جو جِتھاں تئیں ’’گریو یارڈ آف ایمپائر‘‘ (سلطنتاں دا قبرستان) دے بیانیے دا تعلق اے، پاکستان آپ کوں ہرگز ’’ایمپائر‘‘ نئیں آکھدا، حقیقت اے جو افغانستان طالبان دی وجہ توں آپݨے ای لوکاں کیتے ہِک قبرستان توں گھٹ نئیں، تاریخی اعتبار نال افغانستان سلطنتاں دا قبرستان تاں نئیں رہیا البتہ ہمیشہ وݙیاں طاقتاں دے کِھیڈ دا میدان ضرور رہیے۔ وزیر دفاع آکھیا جو طالبان دے اُو جنگجو جیڑھے خطے اِچ بدامنی کھنڈاوݨ وِچ آپݨا ذاتی فائدہ ݙیکھدے پئِن، سمجھ گھِنّن جو انہاں شاید پاکستانی عزم اَتے حوصلے کوں غلط انداز واچ گھِدّے، اگر طالبان رجیم لڑݨ دی کوشش کَریسی تاں دنیا ݙیکھسی جو انہاں دی دھمکیاں صرف ݙکھاوا ہن۔ انہاں آکھیا جو پاکستان آپݨی زمین تے کہیں وی دہشت گردی یا خودکُش حملے کوں برداشت نہ کریسی اَتے کہیں وی مہم جوئی دا جواب سخت ہوسی، طالبان رجیم کوں چاہیدے جو آپݨے انجام دا حساب ضرور رکھّے، کیوںجو پاکستان دے عزم اَتے صلاحیتاں کوں آزماوݨ انہاں کیتے ٻہوں مَہانڳا ثابت تھیسی۔