سکیورٹی فورسز پاک-افغان سرحد دے ذریعے ‘خارجیاں’ دی اندر آوݨ دی کوشش ناکام بݨا ݙتی، ‘خارجی’ کمانڈر سودھے 4 دہشت گرد ہلاک، آئی ایس پی آر

راولپنڈی۔ 30 اکتوبر (اے پی پی) سکیورٹی فورسز پاک-افغان سرحد دے ذریعے ‘خارجیاں’ دی اندر آوݨ دی کوشش ناکام بݨا ݙتی، اتے ‘خارجی’ کمانڈر سودھے 4 دہشت گرداں کوں ہلاک کر ݙتا۔ خمیس کوں پاک فوج دے شعبہ تعلقات عامہ (آئی ایس پی آر) توں جاری بیان موجب، 29 اتے 30 اکتوبر دی وچلی رات باجوڑ ضلع اچ سکیورٹی فورسز ہک گروہ دی حرکت دا پتہ لاتا جیڑھا جو پاکستان-افغانستان سرحد دے رستے اندر آوݨ دی کوشش کریندا پیا ہا۔ پاک فوج دے جواناں اثر انگیز کارروائی کر تے ‘خارجیاں’ دی اندر آوݨ دی کوشش کوں ناکام بݨا ݙتا۔ طاقتور نشانے اتے مہارت نال کیتی ڳئی کارروائی دے نتیجے اچ چار ‘خارجی’ جنہاں اچ ہک اہم ‘خارجی’ رہنما امجد عرف مزاحم وی شامل ہا، واصلِ جہنم کر ݙتے ڳئے۔ ہلاک ‘خارجی’ کمانڈر امجد ‘خارجی’ نور ولی دا نائب اتے بھارتی پراکسی ‘فتنہ الخوارج’ دی رہبری شوریٰ دا سربراہ ہا۔ اوہ قانون نافذ کرݨ آلے اداریاں کوں انتہائی مطلوب ہا اتے حکومت پاکستان اوندے سر دی قیمت 50 لکھ روپے مقرر کر رکھی ہئی، کیوںجو او افغانستان اچ رہندیں ہوئیں پاکستان دے اندر کئی دہشت گرد کارروائیاں اچ ملوث رہیا۔ ایں گالھ کوں یاد رکھݨا چاہیدے جو ‘فتنہ الخوارج’ دی قیادت جیڑھی جو افغانستان اچ بیٹھی ہوئی اے، پاکستان اچ اندر آوݨ دی کوششاں منظم کریندی پئی اے تانجو اے تاثر ݙے سڳے جو انہاں دی پاکستان اچ موجودہ اے اتے باجوڑ و مہمند اچ سکیورٹی فورسز دی اثر انگیز کارروائیاں پاروں ‘خارجیاں’ دے ڈہندے حوصلے کوں بحال کیتا ونڄ سڳے۔ آئی ایس پی آر آکھیا جو عبوری افغان حکومت کوں چاہیدے جو او پکے اقدامات کرے تانجو افغان زمین کوں ‘خارجی’ پراکسیز ولوں پاکستان دے خلاف دہشت گردی کیتے استعمال نہ کیتا ونڄ سڳے۔ بیان اچ آکھیا ڳیا جو پاکستان دی سکیورٹی فورسز وطنِ عزیز دی سرحداں دے دفاع دے عزم تے مضبوطی نال قائم ہن۔ علاقے اچ بھارتی حمایت یافتہ ‘خارجیاں’ دے خاتمے کیتے سینیٹائزیشن آپریشن جاری اے۔ سکیورٹی فورسز اتے قانون نافذ کرݨ آلے ادارے ’’عزمِ استحکام‘‘ دے وژن دے تحت دہشت گردی دے خلاف مہم کوں پوری قوت نال جاری رکھیسن۔