وزیرِ اعظم سٹارٹ اپس کلاؤڈ این ایبلمنٹ پروگرام، پاکستان سٹارٹ اپ فنڈ اتے برج سٹارٹ پاکستان چیک ڈسٹری بیوشن دا اجرا

اسلام آباد۔ 31 اکتوبر (اے پی پی) وفاقی وزیر برائے انفارمیشن ٹیکنالوجی تے ٹیلی کمیونیکیشن شزہ فاطمہ خواجہ آکھیا جو وزیرِ اعظم سٹارٹ اپس کلاؤڈ این ایبلمنٹ پروگرام، پاکستان سٹارٹ اپ فنڈ اتے برج سٹارٹ پاکستان دا آغاز سٹارٹ اپس کوں طاقتور بݨاوݨ، عالمی سرمایہ کاری کوں ودھاوݨ اتے پاکستان کوں عالمی ڈیجیٹل معیشت اچ ہک مضبوط مقابلہ کرݨ آلی طاقت دے طور تے پیش کرݨ دے پکے ارادے کوں ݙکھیندے۔ وزارتِ انفارمیشن ٹیکنالوجی تے ٹیلی کمیونیکیشن آپݨے ماتحت ادارے، اگنائٹ (نیشنل ٹیکنالوجی فنڈ)، دے ذریعے ݙو اہم قومی اقدامات دا باضابطہ آغاز کیتا، جیندے اچ وزیرِ اعظم سٹارٹ اپس کلاؤڈ این ایبلمنٹ پروگرام، پاکستان سٹارٹ اپ فنڈ اتے برج سٹارٹ پاکستان چیک ڈسٹری بیوشن شامل ہن۔ اے تقریب پاکستان اچ نالج بیسڈ ڈیجیٹل معیشت دے ودھارے اتے قومی انوویشن ایکو سسٹم کوں مضبوط بݨاوݨ دے پاسے حکومت دی ہک اہم منزل اے۔ تقریب اچ وفاقی وزیر برائے آئی ٹی تے ٹیلی کمیونیکیشن شزہ فاطمہ خواجہ خاص مہمان دے طور تے شریک تھئی۔ ایں موقعے تے سی ای او اگنائٹ رفیق احمد بُریرو، فاؤنڈرز، سٹارٹ اپس، سی ای اوز، صدر، سانجھے دار، نائب صدر، ڈائریکٹرز، جنرل منیجرز سودھے نجی شعبے اتے سٹارٹ اپ انڈسٹری دے بئے معزز نمائندے، وزارتِ آئی ٹی دے حکام اتے معزز مہمان وی موجود ہن۔ وفاقی وزیر شزہ فاطمہ خواجہ آپݨے خطاب اچ وزیرِ اعظم دے ڈیجیٹل نیشن وژن دے تحت حکومت دے پکے ارادے کوں اُجاگر کریندیں ہوئیں آکھیا جو اے اقدامات انوویشن کوں تیز کرݨ، نویں کاروباری نینگراں کوں طاقتور بݨاوݨ اتے پاکستان کوں عالمی ٹیکنالوجی منظرنامے اچ ہک نمایاں مقام ݙیوݨ اچ اہم کردار ادا کریسن۔تقریب اچ برج سٹارٹ پاکستان توں کامیابی نال گریجویٹ تھیوݨ آلے سٹارٹ اپس کوں چیک اتے اسناد پیش کیتے ڳئے جنہاں اچ موٹویسٹ، پیمو، چاجائو ٹیک، ان لائیٹس سلوشنز، ساحل، تھنگسٹی، کاشمیتا، ایڈورسٹی، کری ایٹو تھری ݙی اتے وائزر مشینز شامل ہن۔