پاک فوج وطن دے دفاع کیتے پُرعزم اے، کہیں وی ٻاہرلی چڑھائی دا جواب تکھا اتے سخت ہوسی، لیفٹیننٹ جنرل احمد شریف چوہدری

اسلام آباد۔ 31 اکتوبر (اے پی پی) پاک فوج دے شعبہ تعلقات عامہ (آئی ایس پی آر) دے ڈائریکٹر جنرل لیفٹیننٹ جنرل احمد شریف چوہدری آکھیا جو پاک فوج وطن دے دفاع کیتے پُرعزم اے، کہیں وی ٻاہرلی چڑھائی دا جواب تکھا اتے سخت ہوسی۔ اے ڳالھیں انہاں ایبٹ آباد اچ مختلف یونیورسٹیاں دے استاداں اتے طالب علماں نال نششت دے دوران خصوصی گالھ مہاڑ کریندیں ہوئیں کیتی۔ ڈی جی آئی ایس پی آر نال خصوصی نششت اچ استاداں اتے طالب علماں دی وݙی گݨتی شرکت کیتی۔ لیفٹیننٹ جنرل احمد شریف چوہدری اڄوکی پاک افغان کشیدگی، ملکی سکیورٹی صورتحال، معرکہ حق سمیت اہم موضوعات تے گالھ مہاڑ کیتی۔ انہاں گالھ مہاڑ اچ صاف ݙسیا جو پاکستان دہشت گردی اتے فتنہ الخوارج دے خلاف اثر آلے اقدامات کیتن۔ انہاں آکھیا جو پاک فوج وطن دے دفاع کیتے پُرعزم اے، کہیں وی ٻاہرلی چڑھائی دا جواب تکھا اتے سخت ہوسی۔ استاداں اتے طالب علماں ولوں شہیداں اتے غازیاں کوں زبردست خراج تحسین پیش کیتا ڳیا۔ وائس چانسلر ہزارہ یونیورسٹی ڈاکٹر اکرام اللہ خان آکھیا جو وطن نال محبت دا صحیح استعارہ پاک فوج اے، پاک فوج ہمیشہ اگلے محاذ تے ہوندی اے اتے اساں انہاں دے نال کھڑوں۔ استاداں گالھ کریندیں ہوئیں آکھیا جو اساݙے ٻالاں دے ذہناں کوں گُمراہ کرݨ کیتے دشمن عناصراں دی سرگرمیاں ودھ ڳئن، ضروری اے جو اساں آپݨے ٻالاں کوں درست اتے سچی معلومات ݙیووں۔ طالب علماں آکھیا جو اساکوں فخر اے جو اساں ایں ملک دے شہری ہیسے جتھ افواجِ پاکستان جیڑھے ادارے نینگراں کوں حوصلہ اتے رہنمائی ݙیندن، اڄ اساکوں سوشل میڈیا تے پاک فوج دے خلاف کھںڈائی ڳئی غلط افواہواں بارے درست معلومات ملین۔ ڈی جی آئی ایس پی آر دے جواباں اساݙے ذہناں توں ملکی اتے صوبائی حالات سودھے افواج پاکستان دے حوالے نال ابہام (شکوک) دور کر ݙتن۔