پنجاب اچ لاؤڈ سپیکر دے استعمال تے پابندی لا ݙتی ڳئی، جمعہ دا خطبہ اَتے آذان کیتے اجازت ہوسی

لاہور۔ 31 اکتوبر(اے پی پی)پنجاب اچ لاؤڈ سپیکر دے ہر قسم دے استعمال تے پابندی لا ݙتی ڳئی اے۔ لاؤڈ سپیکر ایکٹ دی خلاف ورزی کرݨ والیاں نال نبݨݨ کیتے سی سی ٹی وی کیمریاں اَتے ایڈوانس ٹیکنالوجی دے استعمال دا فیصلہ کیتا ڳئے۔ لاؤڈ سپیکر ایکٹ دی خلاف ورزی اَتے غیر مُلکی باشندیاں دی غیر قانونی مدد کرݨ والے عنصر پنجاب حکومت دے سخت شِکنجے اچ ہوسن۔ وزیراعلیٰ مریم نواز دی صدارت اچ امن و امان بارے اجلاس تھیا۔ اجلاس اچ ݙسیا ڳیا جو پنجاب اچ امن دا ڈیجیٹل قلعہ ٻݨ چُکیے، پنجاب اچ ہر قسم دی نفرت، شر اَتے اشتعال انگیزی کیتے مائیک دا استعمال ہمیشہ کیتے بَند تھی ویسی، پنجاب اچ کہیں کاروبار، کہیں جماعت یا کہیں وی ہک بندے کوں کہیں کم کیتے وی لاؤڈ سپیکر دے استعمال دی اجازت نا ہوسی، پورے صوبے اچ جمعہ دے خطبے اَتے پنج وقت دی اذان کیتے لاؤڈ سپیکر تے کوئی پابندی نا ہوسی۔ پنجاب حکومت فیصلہ کیتا جو لاؤڈ سپیکر ایکٹ دا سخت ترین نفاذ ہوسی ڄیکوں سی سی ٹی وی کیمریاں اَتے ٹیکنالوجی نال مانیٹر کیتا ویسی۔ وزیراعلیٰ پورے پنجاب دے 65 ہزار توں ودھ آئمہ کرام دے وظائف کیتے جلدی اقدامات پورے کرݨ دی ہدایت کیتی جیندے کیتے پورے صوبے دِیاں مسیتّاں دی ڈیجیٹل میپنگ شروع کر ݙتی ڳئی اے اَتے وظائف دا اندراج شفاف طریقے نال پورا کیتا ویسی۔ پنجاب حکومت پورے صوبے دِیاں مسیتّاں دی سجاوٹ، مرمت اَتے بحالی دا وی فیصلہ کیتے۔ مسیتّاں اچ ضروری سہولتاں ݙتیاں ویسن اَتے مسیتّاں دے نال دے رستیاں کوں صاف اَتے نکاسی دے نظام کوں بہتر بݨایا ویسی۔ اجلاس اچ امن و قانون دی نویں راہ مقرر کیتی ڳئی۔ سوائے فسادیاں اَتے انتہا پسند سوچ والے عنصر دے، پنجاب اچ کہیں مذہبی جماعت تے کوئی پابندی کائنی۔ مذہبی جماعتاں ضابطہ اخلاق دے مطابق آپݨیاں سرگرمیاں کوں بلا روک ٹوک جاری رکھ سڳدین۔ پنجاب حکومت مذہبی ہم آہنگی اچ مدد کرݨ والیاں جماعتاں دی پوری سرپرستی کریسی۔ مذہب دا ناں ڳھن تے نفرت کھنݙاوݨ والیاں کیتے قانون دی رسّی تنگ کر ݙتی ڳئی اے۔ وزیراعلیٰ غیر قانونی اسلحہ سرنڈر کرݨ والے لوکاں دے جذبہ تعاون تے اطمینان کیتے۔ غیر قانونی اسلحہ رکھݨ یا لُکاوݨ والیاں دے خلاف سخت کاروائی ہوسی۔ پنجاب حکومت غیر قانونی طور تے رہݨ والے غیر مُلکیاں دی مدد یا معاونت کرݨ تے سخت سزا دا اعلان کیتے۔ سوشل میڈیا تے نفرت، کُوڑ اَتے اشتعال کھنݙاوݨ آلیاں دے خلاف پیکا ایکٹ دے تحت کاروائی کیتی ویسی۔ ڈیجیٹل پلیٹ فارمز تے نفرت انگیز مواد دی نگرانی کیتے سپیشل یونٹس فعال کر ݙتے ڳئن۔