گلگت بلتستان کوں ترقی، انصاف اَتے برابری دی مثال بݨاوݨ کیتے اساں ساریاں کوں اجتماعی عزم دا پکا ارادہ کرݨا چاہیدے۔ صدر مملکت آصف علی زرداری

گلگت۔ 1 نومبر (اے پی پی) صدر مملکت آصف علی زرداری آکھیا جو گلگت بلتستان کوں ترقی، انصاف اَتے برابری دی مثال بݨاوݨ کیتے اساں ساریاں کوں آپݨے اجتماعی عزم دا پکا ارادہ کرݨا چاہیدے۔ گلگت بلتستان میڈا ݙوجھا گھر اے، اتھاں دے بہادر لوکاں آپݨی مدد آپ دے تحت آزادی حاصل کیتی اَتے پاکستان نال الحاق کیتا۔ او ہفتے کوں گلگت بلتستان دے 77ویں یومِ آزادی دے موقع تے آرمی ہیلی پیڈ گراؤنڈ گلگت اچ تھیوݨ آلی مرکزی تقریب کوں مزمان خصوصی دے طور تے خطاب کریندے پئے ہَن۔ انہاں جنگِ آزادی گلگت بلتستان دے شہیداں کوں شاندار لفظاں اچ خراجِ عقیدت پیش کیتا۔ صدر مملکت آکھیا جو ذوالفقار علی بھٹو دی حکومت ویلھے توں پاکستان پیپلز پارٹی گلگت بلتستان کوں خاص اہمیت ݙتی۔ بھٹو ایف سی آر ختم کیتا، قانون ساز اسمبلی، گورنر اَتے وزیر اعلیٰ دا نظام متعارف کرایا۔ انہاں آکھیا جو گلگت بلتستان اچ معدنیات اَتے سیاحت دے بہوں موقع موجود ہِن جنہاں توں پُورا فائدہ چاوݨ دی لوڑھ اے۔ سی پیک نال پاکستان اَتے چین دی دوستی ٻئی مضبوط تھئی اے اَتے ترقی دے ٻئے موقع بݨے ہِن۔ صدر آصف علی زرداری آکھیا جو پیپلز پارٹی ہمیشہ صحت اَتے تعلیم کوں اپݨی ترجیحاں اچ رکھیا۔ انہاں بھارت دی پالیسیاں تے تنقید کریندیں ہوئیں آکھیا جو بھارت اچ جیہڑے علاقیاں اچ مسلمان ودھ ہِن، انہاں کوں تھوڑی گݨتی اچ بدلݨ دی کوشش کیتی ویندی پئی اے۔ انہاں آکھیا جو گزریل 70 سالاں توں گلگت بلتستان دی عوام پاکستان دے نال کھڑِن۔ اے خطہ نہ صرف اساݙے سِر دا تاج اے بلکہ چین دے نال پاکستان دے زمینی رابطے دا ذریعہ وی اے جئیں نال ملک اچ خوشحالی آئی اے۔ صدر آکھیا جو 1 نومبر نہ صرف گلگت بلتستان بلکہ پورے پاکستان دا یومِ آزادی اے۔ ایں موقع تے صدر مملکت آصف علی زرداری پریڈ دا معائنہ وی کیتا۔ ایں توں پہلے صدر آصف علی زرداری جݙاں گلگت ایئر پورٹ پڄے تاں گورنر گلگت بلتستان سید مہدی شاہ اَتے وزیر اعلیٰ گلگت بلتستان گلبر خان انہاں کوں خوش آمدید آکھیا۔ تقریب توں خطاب کریندیں ہوئیں وزیر اعلیٰ گلگت بلتستان گلبر خان جشنِ آزادی دی تقریب اچ شرکت کرݨ تے صدرِ مملکت آصف علی زرداری دا شکریہ ادا کیتا۔ ایں موقع تے کمانڈر ٹن کور لیفٹیننٹ جنرل احسن عامر نواز، فورس کمانڈر شمالی علاقہ جات میجر جنرل سید امتیاز گیلانی، بئے اُوچے سول اَتے عسکری حکام اَتے عوام دی وݙی تعداد شرکت کیتی۔